MANILA, Philippines – Ipinresenta ng prosekusyon nitong Miyerkules, Oktubre 7, ang representative ng ilang insurance companies para tumestigo sa milyon-milyong pisong halaga ng insurance policies at investment ni Vice President Sara Duterte at asawang si Atty. Manases Carpio, bilang bahagi ng impeachment proceedings sa alegasyon ng unexplained wealth.
Tumestigo ang representative mula sa anim na insurance companies para sa kabuuang 19 insurance policies na hawak ng mag-asawa mula 2010.
Isa sa pinakamalaking naipresenta na policy ay ang aktibong P10.6 milyong lump-sum insurance investment na binili ni Carpio noong Mayo 2024, ayon kay Atty. Juan Sotero Roman ng FWD Life Insurance Corp.
Sa cross examination, paulit-ulit na ipinunto ng defense lawyers na sa ilalim ng amended Insurance Code, hindi kailangan ang consent ng asawa kung ang asawa ay bibili ng insurance policy kahit pa naka-pangalan ang asawa bilang isa sa mga benepisyaryo.
Iginiit naman ng prosekusyon na ang halaga ng insurance policies na ipinresenta sa korte ay hindi tugma sa deklarasyon ng mag-asawang Duterte-Carpio sa kanilang Statements of Assets, Liabilities and Net Worth (SALNs).
Tinutulan ng depensa ang pagtestigo ng mga witness sa laman ng SALN.
Nagtanong naman si Senate President Sherwin Gatchalian kung ang P10.6-million insurance investment ay maaaring ikonsidera bilang personal asset, kinumpirma ni Roman na maaari itong ikonsiderang personal asset.
“Itong 10.6 million considered ba ito asset ng tao?,” tanong ni Gatchalian sa witness.
“I can say sir that the 10.6 million paid for this, there will be money coming out of this account… It’s an asset,” sagot ni Roman.
Samantala, ipinunto naman ni Senator-Judge Erwin Tulfo ang posibilidad na ang insurance policies ay nagagamit para sa money laundering.
“For example, talagang suspected na nilo-launder yung pera, nililinis sa pamamagitan ng pagkuha po ng policies for investment, what will you do?,” tanong ni Tulfo.
“At point of our application, Your Honor, we may not be able to determine if it is money laundering as will be defined by a court of proper jurisdiction. We, however, have a mandate from the Anti-Money Laundering Council and the Insurance Commission to identify the person and the sources of their fund, Your Honor,” sagot ni Roman.
Dagdag pa, ipinresenta ng prosekusyon ang representative mula sa BDO Securities Corporation, para tumestigo sa pagbili ni Carpio ng P25 milyong halaga ng equities at bonds mula 2021 hanggang 2024, at P4.5 milyong halaga ng investment mula 2020 hanggang 2025.
Iginiit naman ng depensa na hindi kailangan ang consent ni Duterte para makabili si Carpio ng investment.
Nakatakdang ipresenta ng prosekusyon ang representative mula sa Bureau of Internal Revenue ngayong Huwebes para sa tax records ni Duterte. RNT/JGC
