P88.8M pasilidad ng UP Manila, gagamitin sa pagsasanay ng mga future doctor, nurse

MANILA, Philippines – Ininspeksyon ng Department of Budget and Management (DBM) at University of the Philippines Manila ang tatlong modernong pasilidad na nagkakahalaga ng kabuuang ₱88.8 milyon para mapahusay ang pagsasanay ng mga susunod na doktor, nurse at allied health professionals.

Pinangunahan nina DBM Secretary Kim Robert C. de Leon at UP Manila Chancellor Dr. Michael L. Tee ang inspeksyon nitong Biyernes, Oktubre 9. Kabilang sa mga pasilidad ang Skills Laboratory ng College of Medicine na nagkakahalaga ng ₱33.8 milyon, Skills and Simulation Laboratory ng College of Nursing na nagkakahalaga ng ₱45.8 milyon, at Smart Classrooms ng College of Allied Medical Professions na nagkakahalaga ng ₱10 milyon.

Ayon sa DBM, hindi sapat ang libreng matrikula lamang dahil kailangan ding magkaroon ng de-kalidad na pasilidad at kagamitan upang maihanda ang mga estudyante bago humarap sa mga totoong pasyente.

Binigyang-diin ni De Leon na responsibilidad ng pamahalaan na tiyaking maayos at kumpleto ang kagamitan ng mga pampublikong pamantasan. Sinabi naman ni Tee na ang pamumuhunan sa UP Manila ay pamumuhunan din sa health system ng bansa dahil dito hinuhubog ang mga propesyonal na maglilingkod sa mga pampublikong ospital.

Layunin ng mga bagong pasilidad na gawing mas praktikal at ligtas ang pagsasanay ng mga estudyante bago sila sumabak sa aktuwal na trabaho sa mga ospital. Jocelyn Tabangcura-Domenden/larawan kuha ni Cesar Morales