MANILA, Philippines – Pinagtibay ni Senate President at Presiding Officer Chiz Escudero ang pag-urong ng House prosecution panel sa tatlong artikulo ng impeachment laban kay Vice President Sara Duterte, ngunit may kalakip itong mga kondisyon.
Sa desisyong inilabas nitong Martes, sinabi ni Escudero na dapat panagutan ng prosekusyon ang mga legal na kahihinatnan ng pag-urong sa Article I na tumatalakay sa confidential funds at Article IV na may kaugnayan sa grave threats.
Binigyang-diin din niya na hindi na maaaring muling ihain ng House of Representatives ang mga naturang reklamo sa panahon ng ika-20 Kongreso.
“Dapat tanggapin ng prosekusyon ang mga legal na kahihinatnan ng pag-urong na iyon. Hindi maaaring ituring ng House of Representatives ang proseso ng impeachment bilang basta na lamang pagkakataon upang maghain, bumawi, at kalaunan ay muling buhayin—ayon sa kanilang kagustuhan—ang mga akusasyong nakabatay sa Konstitusyon na halos pareho rin naman ang nilalaman,” pahayag ni Escudero. CESAR MORALES
