MANILA, Philippines — Tuloy ang nakatakdang paglilitis kay dating Pangulong Rodrigo Duterte sa International Criminal Court (ICC) sa Nobyembre 30 sa kabila ng mga bagong sanction na ipinataw ng administrasyon ni US President Donald Trump laban sa international tribunal.
Ayon sa ICC, mananatili itong malaya at walang kinikilingan sa pagtupad ng mandato nito, kabilang ang pagdinig sa kasong crimes against humanity na kinakaharap ng dating Pangulo.
Sa pahayag na iniulat ng Philippine News Agency (PNA) nitong Oktubre 14, sinabi ng ICC na patuloy nitong gagampanan ang tungkulin batay lamang sa batas at mga ebidensya upang mabigyan ng hustisya ang mga biktima ng mabibigat na krimen.
Kasunod ito ng anunsyo ng administrasyong Trump noong Oktubre 9 na nagpapataw ng mga sanction laban sa ICC bilang institusyon, kabilang ang pagbabawal sa ilang transaksyon sa korte.
Iginiit ni US Secretary of State Marco Rubio na hindi saklaw ng hurisdiksyon ng ICC ang mga mamamayang Amerikano.
Ayon kay Rubio, layunin ng mga hakbang na putulin ang access ng korte sa mga mapagkukunan nito upang mapigilan ang mga hakbang na itinuturing ng Washington na paglabag sa soberanya ng Estados Unidos.
Gayunman, mariing tinutulan ng ICC ang mga sanction at itinuring ang mga ito na pagtatangkang hadlangan ang isang independiyenteng institusyong panghukuman.
Nauna nang kinumpirma ng ICC Trial Chamber III na may kakayahan si Duterte na humarap sa paglilitis matapos suriin ang kanyang kondisyon at kakayahang gamitin ang kanyang mga karapatan bilang akusado.
Inilabas sa publiko noong Oktubre 8 ang desisyon ng mga hukom na may petsang Setyembre 28, na nagbigay-daan sa pagpapatuloy ng paghahanda para sa paglilitis.
Nahaharap si Duterte sa kasong crimes against humanity of murder kaugnay ng mga pagpatay na iniuugnay sa kampanya kontra ilegal na droga noong kanyang panunungkulan.
Itinatanggi ng dating Pangulo ang mga alegasyon laban sa kanya.
Samantala, inaasahang tatalakayin sa susunod na status conference ang listahan ng mga testigo ng prosekusyon at ang oras na ilalaan sa presentasyon ng mga ebidensya nito.
Sa kabila ng mga sanction, nananatiling Nobyembre 30 ang opisyal na iskedyul ng pagbubukas ng paglilitis, ayon sa ICC. Dave Baluyot
