MANILA, Philippines – Pinaghahandaan na ng Department of Social Welfare and Development (DSWD) ang posibleng epekto ng Super Typhoon Champi na kasalukuyang binabantayan sa labas ng Philippine Area of Responsibility (PAR).
Sinabi ni Asst. Secretary Irene Dumlao ng Disaster Response Management Group (DRMG) ng DSWD na patuloy na inihahanda ng Kagawaran ang mga relief stockpile at nagpapatakbo ng mga disaster resource centers nang hindi naghihintay ng mga kalamidad.
“The DSWD does not wait for disasters to happen before preparing. At yung atin pong mga major production hubs ay non-stop sa pag-produce ng family food packs for immediate deployment. Kasi hindi pwede kung kailan pa magkaroon ng sakuna tsaka pa lang tayo kilo,” sinabi ni Asst. Secretary Dumlao, na siya ring tagapagsalita ng DSWD nitong Linggo, Oktubre 18.
Ang pinaigting na paghahanda ng DSWD para sa kalamidad ay naaayon sa direktiba ni Pangulong Ferdinand R. Marcos Jr. na panatilihin ang sapat na pambansang stockpile at tiyakin ang mabilis na paghahatid ng tulong na tulong sa mga lugar na nasalanta ng kalamidad.
“Sa pamamagitan ng ating mga strategic hubs at warehouses, pinapanatili nating aktibo ang supply chain para agad nating maipahatid ang mga regular na augmentation support kung sakali man na manghingi ng tulong sa mga komunidad na maaaring maapektuhan,” sinabi pa niya.
Batay sa ulat, 6:00 ng umaga ng Oktubre 18, ng Disaster Response Operations Monitoring, Information, and Communication (DROMIC), ang DSWD ay nagpapanatili ng nationwide prepositioned relief inventories na nagkakahalaga ng 4,571,390 family food packs (FFPs), 344,942 non-food items (NFIs,4-F5-204) mga pakete.
Kaugnay nito patuloy na binabantayan ng DSWD ang weather updates mula sa Philippine Atmospheric, Geophysical and Astronomical Services Administration (PAGASA) dahil maaaring maapektuhan ng super typhoon ang hilagang Luzon, Cagayan Valley, at hilagang bahagi ng Ilocos Region sa pagtatapos ng linggo.
“Sa atin pong mga kababayan, nanawagan po kami na manatiling alerto, mag-monitor sa mga opisyal na weather bulletin, at sumunod sa mga precautionary measures at abiso ng inyong local government units. Bagamat kami po sa Departamento ay palaging nakahanda, mabuti pong lahat ay nanatiling handa para ma-secure po ang inyong kaligtasan,” sinabi pa ni Dumlao. Santi Celario
