MANILA, Philippines – Arestado ng mga awtoridad ang tatlong drug suspects at nasamsam ang P439,892 halaga ng shabu sa buy-bust operation sa Barangay Kenram, Isulan, Sultan Kudarat, nitong Biyernes, Oktubre 23.
Pinangunahan ng Philippine Drug Enforcement Agency (PDEA) Region 12, sa pamamagitan ng Sultan Kudarat Provincial Office, ang operasyon sa Purok Pagkakaisa sa suporta ng Isulan Municipal Police Station at Sultan Kudarat Provincial Police Office Provincial Drug Enforcement Unit.
Kinilala lamang ang mga naaresto sa alyas na Rika, 29; Jed, 29; at Anthony, 37.
Nasamsam din ng mga awtoridad ang tatlong heat-sealed transparent plastic sachet na naglalaman ng hinihinalang shabu.
Kabilang din sa mga nakumpiska ang genuine P1,000 bill na ginamit bilang buy-bust money, pitong piraso ng boodle money, brown sling bag, pink handbag, transparent plastic sachet, mobile phone, brown coin purse at kotse.
Nahaharap ang mga suspek sa reklamong paglabag sa Sections 5 at 11 ng Article II ng Republic Act No. 9165, o Comprehensive Dangerous Drugs Act of 2002. RNT/JGC
