MANILA, Philippines – Nilinaw ni Senate Minority Leader Alan Peter Cayetano nitong Martes na malaya pa rin ang kanyang mga kasamahan sa Senado na magpasya kung tatanggapin nila ang alok na maging bise presidente sakaling mahatulan si Vice President Sara Duterte sa impeachment trial.
Kasunod ito ng puna ni Sen. Panfilo Lacson sa panawagan ni Cayetano na tanggihan ng mga senador ang posisyon ng bise presidente kung mahatulan si Duterte.
“Everyone remains free to decide. I hope we can consider the concern behind the invitation before taking offense at being asked,” ayon kay Cayetano sa isang social media post.
Nag-ugat ang panawagan ni Cayetano sa pahayag ni impeachment court presiding officer Francis “Chiz” Escudero na tatanggihan niya ang posisyon ng bise presidente dahil kabilang siya sa mga senador-hukom na boboto sa posibleng paghatol kay Duterte.
Ayon kay Cayetano, sa pamamagitan ng pahayag ni Escudero ay naipakita nitong hindi maiimpluwensiyahan ang kanyang boto ng posibilidad na maging bise presidente.
“He could have kept quiet and left the possibility open. Instead, he gave people a reason to trust that his vote would not be influenced by the prospect of becoming Vice President. With so much doubt surrounding our politics, I think we need more of that,” ani Cayetano.
Kapag napatunayang nagkasala si Duterte sa impeachment trial, matatanggal siya sa puwesto. Maaaring magmungkahi si Pangulong Ferdinand Marcos Jr. ng kapalit mula sa Senado o House of Representatives, alinsunod sa mga prosesong konstitusyonal at kinakailangang kumpirmasyon ng dalawang kapulungan.
Binigyang-diin ni Cayetano na maaaring tanggihan ng sinumang senador ang nominasyon.
“The President retains his constitutional authority to nominate a replacement from the Senate or the House if a vacancy arises, subject to confirmation by both chambers. A senator remains free to decline. The President can fulfill his duty while a senator follows his conscience, without either preventing the other from doing what he believes is right,” aniya.
Malugod din niyang tinanggap ang bukas na talakayan tungkol sa mga posibleng mangyari matapos ang impeachment trial.
“I am glad we can discuss these questions openly, and I appreciate those who take the time to consider them calmly and carefully. We owe the public that much, even when we disagree,” ani Cayetano.
“Getting offended by a question does not answer it, and making the discussion personal does little to help people understand what is at stake,” dagdag niya. RNT/MDS
