MANILA, Philippines – May mahigit ₱7 bilyon umanong halaga ng “congressional initiatives” si Sen. Jinggoy Estrada sa 2025 national budget, ayon sa nakasulat na testimonya ni dating Public Works Secretary Manuel Bonoan na isinumite sa Sandiganbayan Fifth Division nitong Martes.
Kasalukuyang dinidinig ng anti-graft court ang petisyon ni Estrada para makapagpiyansa, kung saan tumatayong saksi si Bonoan.
Tinutulan ni Estrada lawyer Lawrence Arroyo ang pagsama ng naturang halaga sa testimonya ni Bonoan dahil aniya, hindi ito kaugnay ng kaso.
Sinabi naman ni special prosecutor Reza Derayunan na, “It is not irrelevant since it is part of the congressional initiatives allocated to Senator Estrada for fiscal year 2025.”
Iginiit ni Arroyo na bagama’t bahagi ng 2025 General Appropriations Act (GAA) ang halaga, hindi ito kasama sa mga alegasyon sa amended Information.
“While they are part of the 2025 GAA [General Appropriations Act], they are not part of the allegation in the amended Information,” ani Arroyo.
Ayon sa abogado, nasa ₱2 bilyon lamang ang halagang saklaw ng kaso ni Estrada.
“There is an excess of P5 billion in the testimony,” dagdag niya.
Gayunman, sinabi ni Associate Justice Zaldy Trespeses na papayagan pa rin ng korte ang pagsama ng naturang halaga sa testimonya ni Bonoan. RNT/MDS
