ILIGAN CITY, Philippines – Arestado ang 13 operator at tagapagpadali ng pustahan sa ikinasang operasyon laban sa isang ilegal na offshore gaming operation sa Iligan City noong Oktubre 29, 2026.
Nasamsam din ng mga awtoridad ang mga kagamitan sa pagsusugal at pagbroadcast na tinatayang nagkakahalaga ng ₱12 milyon.
Isinagawa ang operasyon sa ikalawang palapag ng Ali Property Building sa Prk. 2B, Katipunan, Barangay Hirapolan. Nalaman na nagpapatakbo ang kumpanya sa ilalim ng pagkakakilanlan bilang isang Information Technology Service Provider ngunit sangkot umano ito sa ilegal na online betting activities.
Natukoy na lumalabag ang operasyon sa Seksyon 4(a) ng Republic Act No. 12312 o Anti-POGO Act of 2025. Kaugnay nito, naglabas ang Regional Trial Court Branch 4 sa Iligan City ng Warrant to Search, Seize, and Examine Computer Data (WSSECD) No. 26-04.
Kabilang sa mga nasamsam ang computer processing units, monitor, kamera, recording device, tablet, card scanner, gaming table, baraha, kagamitan sa pag-iilaw at iba pang aksesorya sa pustahan.
Sa 13 naaresto, dalawa ang manager at 11 ang online dealer. Hindi pa rin nahuhuli ang nakarehistrong may-ari ng kumpanya. Nasa kustodiya na ng Police Station 1 ng Iligan City Police Office (ICPO) ang mga suspek para sa dokumentasyon at kaukulang legal na proseso.
Pinangunahan ang operasyon ng magkakatuwang na mga yunit ng Police Regional Office 10 (PRO-10), kabilang ang Iligan City Mobile Force Company, Regional Intelligence Division 10, Regional Intelligence Unit 10, Police Station 1 ng ICPO, Criminal Investigation and Detection Group–Iligan, 1005th Regional Mobile Force Battalion 10, Regional Anti-Cybercrime Unit 10 at City Intelligence Unit ng ICPO.
Nakiisa rin ang National Bureau of Investigation–Iligan, sa suporta ng Presidential Anti-Organized Crime Commission (PAOCC).
Sa ilalim ng pamumuno ni Executive Director at Usec. Benjamin C. Acorda Jr., tiniyak ng PAOCC ang patuloy na pakikipagtulungan sa mga ahensiya ng pagpapatupad ng batas upang labanan ang mga organisadong kriminal na grupo, protektahan ang mga bulnerableng indibidwal at tugunan ang mga banta ng krimen sa loob at labas ng bansa. ERIC OCAPAN
