MANILA, Philippines – Naglunsad na ng imbestigasyon ang Bureau of Jail Management and Penology (BJMP) sa mga alegasyon na nakakalabas si dating House Speaker at Leyte Rep. Martin Romualdez sa Quezon City Jail.
Sa pahayag, sinabi ni BJMP Jail Director Efren Nemeño, na agaran nitong ipinag-utos ang imbestigasyon matapos lumutang ang mga alegasyon.
“The investigation is ongoing. The BJMP reiterates that all persons deprived of liberty (PDL) are subject to the same custodial rules and that any movement outside the jail requires a proper court order,” sinabi ng ahensya.
“We welcome relevant information from the public and will cooperate with any investigation by other government agencies,” dagdag pa.
Nitong Martes, sinabi ni Ramon Tulfo, batay sa impormasyon mula sa source nitong si “tweety bird” na pinapatay umano ni Quezon City Jail-Male Dormitory Superintendent Maria Lourdes Pacion ang kuryente ng pasilidad kung umaalis si Romualdez at bumabalik upang maiwasan na makapagrekord ang CCTV.
Ani Tulfo, ginagamit umano ni Romualdez ang likod na hagdan ng piitan kung saan naghihintay ang ambulansya para ibyahe ito.
“Pareho sa ginagawa noon kay [former senator Bong Revilla], noong bago siya nakapag-bail, kapag nagpapasok ng Vivamax girls. Pinapapatay ni Warden ang ilaw ng buong jail upang palabasin na may brownout,”sinabi ni Tulfo.
“Ewan daw kung Vivamax boys o girls ang pinapapasok para kay [Senator Jinggoy Estrada], sabi ng aking naughty tweety bird,” dagdag pa niya.
Dahil dito ay hinimok ni Tulfo ang mga imbestigador na suriin ang logbook ng power interruptions.
Sa kabila nito, sinabi ng BJMP na sa initial CCTV verification ay walang naitalang power o surveillance camera interruptions at wala ring naitalang paggalaw ni Romualdez sa pasilidad sa sinuring panahon.
“Initial CCTV verification by BJMP National Headquarters showed no recorded power or CCTV interruption at the Quezon City Jail-Male Dormitory, and no recorded movement of Rep. Martin Romualdez outside the facility during the period examined,” anang ahensya.
“The BJMP assures the public of its commitment to professionalism, transparency, and equal treatment of all PDL, without distinction or special privilege,” dagdag pa.
Si Romualdez ay naka-detain sa Quezon City Jail kaugnay sa P7.44 bilyong plunder case sa mga umano’y kickback mula sa flood control, infrastructure at iba pang proyekto ng gobyerno mula 2022 hanggang 2025. RNT/JGC
