MANILA, Philippines — Iginiit ng defense panel ni Vice President Sara Duterte na iginagalang nito ang desisyon ni dating law dean Ralph Sarmiento na huwag tumestigo sa impeachment trial ng Bise Presidente.
“We respect Dean Sarmiento’s personal decision and appreciate his initial consideration of our invitation,” pahayag ni defense counsel at spokesperson Atty. Michael Poa.
Nauna nang tumanggi si Sarmiento na humarap bilang defense witness, kasabay ng paliwanag na nais niyang mapanatili ang independence ng kanyang constitutional law scholarship at impartiality ng kanyang legal views at opinions.
Hiniling din ni Sarmiento sa defense team na bawiin ang request para sa kanyang subpoena, o iparecall ito kung naipalabas na.
Sinabi naman ni Poa na nagpapasalamat ang kanilang kampo sa paunang pagsasaalang-alang ni Sarmiento sa imbitasyon at nirerespeto ang kanyang desisyon.
“We wish him well in his continued contributions to constitutional discourse,” dagdag niya.
Naunang isinama si Sarmiento sa listahan ng mga defense witness kaugnay ng unexplained wealth allegation laban kay Duterte.
Nakatakda sana siyang humarap sa Senate impeachment court sa Nobyembre 9. RNT
