MANILA, Philippines – Kinwestyon ng prosekusyon at ilang senator-judges ang unang witness na ipinresenta ng depensa sa umano’y all-expenses-paid trip nito sa China noong nakaraang taon.
Sa cross-examination, tinanong ni private prosecutor Benjamin Tolosa Jr. si Davao City assessor Engineer Jaime Adalin kung totoo ba na siya ay kabilang sa mga opisyal ng Davao City local government na nagtungo sa China noong Nobyembre 2025 para sa all-expenses-paid tour na inisponsoran ng Chinese consulate.
Tinutulan naman ni defense counsel Lindon Bacquel ang tanong sa relevance nito.
Ani Tolosa, nais lamang alamin ng prosekusyon ang kredibilidad ng witness kung aamin ba ito sa naturang usapin.
“I think that is irrelevant,” sinabi ni Adalin.
Natawa naman si Senate impeachment court presiding officer Francis Escudero at sinabing, “Funny ka do’n ha, Engineer Jimmy.”
Samantala, sinabi ni Adalin na hindi niya maalala ang petsa ng naturang byahe.
“You cannot recall, sir? If in November 2025, you went to China? Last year? You cannot recall that?” tanong ni Tolosa.
“Your Honor, this is a probing question. I think it’s been clear how evasive this witness has been,” dagdag pa niya.
Hiniling naman ni Bacquel na alisin ang “evasive” remark ni Tolosa sa rekord ngunit nagdesisyon si Escudero na panatilihin ito.
Naniniwala naman si Senator-Judge Vicente “Tito” Sotto III na mahalaga ang tanong para masukat ang kredibilidad ng witness.
“If he doesn’t want to answer, we can always ask the Bureau of Immigration. Simple…then the credibility is proven,” dagdag ni Sotto.
Dito na tinanong ni Escudero si Adalin kung naaalala niya ang pagbiyahe sa China noong nakaraang taon.
“Siguro? Again, I don’t have the record. Hindi mo naman memorize ‘yung mga lakad mo ‘no,” sagot ng witness.
Ayon naman kay Senator-Judge Erwin Tulfo, tila nakikipaglokohan ang witness at sabay nagpaalala na maaari itong ma-cite in contempt sa kanyang ginagawa.
“Mr. Presiding Officer, para ho tayong niloloko ng testigo na ito. Sir, may I remind you that you’re under oath. ‘Yung ginagawa ho ninyong, ginagawa niyong kengkoy ang inyong testimonya, bawal po ‘yan. We can cite you for contempt,” ayon sa senator-judge.
“We’re serious here. Tinatanong ho kayo, nakapunta ba kayo? Ayaw niyong sabihin. ‘Yung petsa, hindi niyo rin malaman. Kung talagang hindi niyo alam, eh hindi niyo alam. Mr. Presiding Officer, just remind this witness na under oath po siya. ‘Yung pagsisinungaling po eh nasa kanya ho ‘yun, may consequences po ‘yan,” dagdag pa. RNT/JGC
