MANILA, Philippines – BIBISITA sa Pilipinas si Brazilian President Luiz Inácio Lula da Silva sa Nobyembre 14–15, 2026, sa paanyaya ni Pangulong Ferdinand R. Marcos Jr. para palakasin ang ugnayan ng dalawang bansa at palawakin ang pagtutulungan sa kalakalan, pamumuhunan, agrikultura, enerhiya, agham at teknolohiya, depensa, at iba pang larangan.
Bilang pinakamalaking bansa at may pinakamalaking ekonomiya sa Latin America, mahalagang katuwang ng Pilipinas ang Brazil sa pagpapalawak ng ugnayan sa rehiyon.
Gaganapin ang State Visit bago ang pagho-host ng Pilipinas sa 49th ASEAN Summit and Related Summits bilang ASEAN Chair. Inimbitahan din ni Pangulong Marcos si President Lula na dumalo sa Plenary Session ng 49th ASEAN Summit bilang Guest of the Chair. Ang Brazil ay isang Sectoral Dialogue Partner ng ASEAN.
Sasalubungin ni Pangulong Marcos si Pangulong Lula sa Philippine International Convention Center (PICC), kung saan magsasagawa ang dalawang lider ng bilateral meeting upang talakayin ang pagpapalawak ng kanilang ugnayan at pagtutulungan sa iba’t ibang pandaigdigang usapin.
Makasaysayan ang pagbisitang ito dahil ito ang unang pagkakataong bibisita sa Pilipinas ang isang nakaupong Pangulo ng Brazil. Kasabay din ito ng pagdiriwang ng ika-80 anibersaryo ng diplomatikong ugnayan ng dalawang bansa.
Bagama’t magkalayo ang Pilipinas at Brazil, marami silang pagkakatulad sa kultura at tradisyon na nagsisilbing pundasyon ng kanilang pagkakaibigan.
Parehong may matibay na tradisyong Katoliko ang dalawang bansa, may makukulay na pagdiriwang, mayamang katutubong kultura, at pagpapahalaga sa pamilya at komunidad.
Kilala rin ang mga Pilipino at Brazilian sa pagiging magiliw, masayahin at malapit sa pamilya. Pareho rin silang mahilig sa musika, sayaw, palakasan at masasarap na pagkain.
Ang mga pagkakatulad na ito ay nagbibigay ng mas maraming pagkakataon upang palakasin ang ugnayan ng dalawang bansa sa pamamagitan ng palitan ng kultura, turismo, edukasyon, palakasan at iba pang programa.
Itinatag ng Pilipinas at Brazil ang kanilang pormal na diplomatikong ugnayan noong Hulyo 4, 1946. Ipinagdiriwang ng dalawang bansa ngayong 2026 ang kanilang ika-80 anibersaryo ng pagkakaibigan at pagtutulungan.
Sa kabila ng kanilang pagkakaiba sa kasaysayan at heograpiya, kapwa pinahahalagahan ng mga Pilipino at Brazilian ang demokrasya, pagkakaisa, katatagan, kasipagan at pag-asang magkaroon ng mas magandang kinabukasan. KRIS JOSE
