MANILA, Philippines – Itinalaga ni Pangulong Ferdinand Marcos Jr., si Vice Admiral Alan Javier bilang bagong Flag-Officer-in-Command (FOIC) ng Philippine Navy.
“The DND congratulates Vice Admiral Alan M. Javier for being appointed by the Commander in Chief, President Ferdinand Marcos Jr, as the new Flag-Officer in Command (FOIC) of the Philippine Navy,” ayon sa kalatas ng Department of National Defense (DND).
Sa ulat, ang pinakahuling pinagsilbihan ni Javier ay bilang commander ng Western Command.
Pinamunuan din ni Javier ang Western Naval Command, dating naging kilala bilang Naval Forces-West, at nagsilbi bilang hepe ng Naval Staff.
Para sa DND, dala ni Javier ang operational urgency at strategic direction na kinakailangan para pangunahan ang Philippine Navy at panatilihin ang naval operations ng bansa.
Pinalitan ni Javier si Vice Admiral Jose Ma Ambrosio Ezpeleta, na nagretiro mula sa serbisyo matapos ang mahigit sa 35 taon sa military.
Pinagunahan naman ni Pangulong Marcos ang change of command at retirement ceremony sa Philippine Navy headquarters sa Naval Station Jose Andrada sa Maynila.
Pinasalamatan naman ni Javier si Pangulong Marcos para sa tiwala at kumpiyansa sa kanya.
Para sa Pangulo, ang background ni Javier ay magiging mahalaga sa pagtiyak na ang lumalagong fleet ng Philippine Navy ay mananatiling “capable, well-supported, and ready to fulfill its mission.”
“Build on these gains. Strengthen our ability to defend our territory and protect our sovereign rights. Deepen our partnerships with our allies and friends. And sustain our commitment to the welfare of every sailor and every marine,” ang tinuran ng Pangulo.
“As you carry this mission forward, know that you have the full support of this administration,” aniya pa rin. (KRIS JOSE)
