Manila, Philippines – Muling napabilang sa hanay ng mga kinikilalang provincial leaders sa bansa ang actor turned politician na si Bulacan Governor Daniel Fernando matapos mapasama sa listahan ng Top Performing, Most Trusted Provincial Governors in the Philippines.
Batay sa inilabas na resulta ng pinakahuling Sigaw ng Bayan Survey,
nakakuha si Fernando ng 82.5 percent trust rating, dahilan upang mapabilang siya sa Top 15 provincial governors sa buong bansa.
Ang 82.5% trustrating at ika-12 puwesto ay iniulat ng Provincial Government of Bulacan.
Isinagawa ang survey mula Oktubre 1 hanggang 15, 2026, na kinasangkutan umano ng 50,000 respondents.
Ngunit bukod sa kanyang pangalan sa mundo ng politika, may isa pang dahilan kung bakit hindi bago sa publiko ang personalidad ni Fernando—ang kanyang makulay na nakaraan sa industriya ng showbiz.
Bago siya naging gobernador ng Bulacan, nakilala muna si Fernando bilang isang aktor sa pelikula at telebisyon.
Hindi lamang basta artista ang kanyang naging karanasan dahil kinilala rin ang kanyang talento sa pag-arte, kabilang ang pagkakapanalo niya ng Best Actor award sa Gawad Urian noong 1989.
Mula sa harap ng kamera hanggang sa harap ng mga Bulakenyo, tila nagkaroon ng panibagong yugto ang kanyang career. Kung noon ay mga karakter sa pelikula ang kanyang ginagampanan, ngayon naman ay tungkulin ng isang lingkod-bayan ang kanyang tinatahak.
Kapansin-pansin din ang kakaibang crossover ng kanyang career: mula sa mundo ng entertainment, kung saan mahalaga ang suporta ng manonood, patungo sa public service, kung saan mahalaga ang tiwala ng mamamayan.
Sa showbiz, hindi sapat ang kasikatan para manatili sa industriya.
Sa public service naman, ang tiwala ay kailangang patuloy na pinagtitibay sa pamamagitan ng konkretong gawain.
Para kay Fernando, ang pagkakasama sa naturang listahan ay isa pang mahalagang kabanata sa kanyang paglalakbay—mula sa pagiging artista hanggang sa pagiging provincial chief executive.
Sa huli, maaaring magbago ang entablado, kamera at papel na ginagampanan, ngunit nananatiling mahalaga ang isang bagay: ang tiwalang ipinagkakaloob ng publiko. JP Ignacio
