MANILA, Philippines – Nagbabala ang National Capital Region Police Office (NCRPO) na maaaring sampahan ng kasong kriminal ang mga indibidwal na nanakit sa mga pulis sa isang rally matapos masugatan ang ilang tauhan nito sa komprontasyon.
Ayon kay NCRPO chief Brig. Gen. Christopher Abrahano, hindi palalampasin ng pulisya ang anumang karahasan laban sa kanilang mga tauhan.
Nasugatan ang 15 pulis at inaresto ang walong indibidwal matapos lumala ang komprontasyon ng mga raliyista at pulis sa Liwasang Bonifacio noong Nobyembre 15.
Nabigyan ng paunang lunas ang mga nasugatang pulis at nakabalik na sa serbisyo, ayon kay Abrahano.
Sinabi ng Philippine National Police na maaaring maharap sa mga kasong may kaugnayan sa tumult, paglabag sa kaayusang pampubliko, direct assault at illegal assembly ang walong inaresto.
Inatasan din ni Abrahano ang mga kinauukulang police unit na mangalap ng mga ebidensya, kabilang ang mga video, upang matukoy ang mga responsable at maisampa ang nararapat na kaso.
Naganap ang mga kilos-protesta sa iba’t ibang lugar kasabay ng ika-49 na Association of Southeast Asian Nations (ASEAN) Summit. Kabilang sa mga tinututulan ng mga grupo ang pagdating ni US President Donald Trump, ang panukalang US-led Pax Silica initiative at iba pang hakbang.
Samantala, mahigit 200 indibidwal naman ang inaresto sa isang protesta sa Muntinlupa noong Lunes dahil sa umano’y pagsasagawa ng ilegal na demonstrasyon.
Binigyang-diin ni Abrahano na dapat pairalin ng mga pulis ang maximum restraint at gumamit lamang ng puwersa kung kinakailangan. Aniya, hindi dapat isakripisyo ang propesyonalismo at paggalang sa karapatang pantao sa pagpapatupad ng batas. RNT/MDS