ADB Kaiju kinuyog ng CSOs; minamadaling Energy Policy Review, pinalagan

MANILA, Philippines – Muling nagwagi ang kabutihan laban sa kasamaan matapos na pabagsakin ni Ultraman ang tinaguriang ADB Kaiju!

Ganito ang naging tagpo sa harap ng himpilan ng Asian Development Bank sa Mandaluyong, Huwebes, Agosto 14, 2025 sa isinagawang kilos-protesta ng iba’t ibang Civil Society Organizations (CSOs) at advocacy groups upang tutulan ang tinawag nilang minamadali at malabnaw na 2025 Energy Policy Review (EPR).

Sa ikinasang creative action, nirepresenta ni Ultraman ang mga komunidad at CSOs na nagsusulong ng just energy transition, para labanan ang ADB Kaiju na kumakatawan naman sa pagtutulak ng bangko ng fossil fuels tulad ng coal, gas at mga huwad na solusyong pang-enerhiya tulad ng nuclear, critical mineral mining at co-firing technologies gaya ng biofuels, hydrogen at ammonia.

Giit ng CSOs, mali ang pagratsada ng ADB sa ginagawang rebyu nito sa kanilang Energy Policy dahil hindi katiting at may malaking epekto ang mga pagbabago na nais nilang isingit sa kanilang polisiya.

Sa orihinal na plano ng ADB, tatapusin ang EPR sa 2026, ngunit sa niratsadang timeline ay balak maglabas ng pinal na draft sa Setyembre at aprubahan agad ito ng ikaapat na quarter ng 2025.

“Ang minadaling Energy Policy Review ngayong taon ng ADB ay malinaw na patunay na inuuna ang interes ng malalaking korporasyon kaysa sa tao at kalikasan. Sa halip na ayusin ang mga kakulangan sa kasalukuyang polisiya, lalo pang pinalala ng Bangko ang problema sa kanilang pamumuhunan,” ani Nazareth Del Pilar ng NGO Forum on ADB.

“Kung meron mang isang bagay na mahusay gawin ang ADB, iyon ay ang balewalain ang bigat ng mahahalagang polisiya ng bangko—kahit na malaki ang kapalit nito para sa mga bansa at mamamayan,” giit naman ni Elle Bartolome ng Philippine Movement for Climate Justice (PMCJ).

Isa rin sa pinakamatinding tinuligsa ng CSOs ang nakatakdang pagtanggal ng nuclear ban financing ng ADB na nakikita bilang isang mapanganib na probisyon. Ito ay sa kabila ng mga umiiral na banta nito sa aspetong pinansyal, kaligtasan, epekto sa karatig na mga komunidad at nuclear waste disposal, kung saan perpektong halimbawa ang Bataan Nuclear Power Plant (BNNP).

“Mariin naming tinututulan ang tangkang pagsasa-“normal” ng ADB sa paggamit ng nuclear energy bilang solusyon. Para sa amin, ang BNPP ay hindi simbolo ng pag-unlad—isa itong paalala ng palpak na polisiya sa enerhiya at kasakiman ng mga korporasyon. Ang pagbabalik ng pagpopondo para sa nuclear ay magpapalubog lang ng bansa sa utang, magpapalayas ng mga komunidad, at maglalagay sa mga susunod na henerasyon sa panganib na hindi na maibabalik, ayon sa Nuclear/Coal-Free Bataan Movement.

Sa huli, iginiit ng grupo sa ADB ang isang transparent, inklusibo, at makatarungang polisiya; ang pagpapalawig sa Energy Policy Review sa ngalan ng totoong konsultasyon; isang polisiya na hindi pumapanig sa kapakanan ng polluters; ang pagwaksi ng false energy solutions; ang paglakip ng malakas na proteksyon para sa kapakanan ng komunidad; at ang pagpapanatili ng Free, Prior, and Informed Consent (FPIC) sa lahat ng energy projects.

Kabilang sa mga grupong sumama sa kilos-protesta ay ang Alyansa Tigil Mina, Philippine Movement for Climate Justice (PMCJ), Asian Peoples’ Movement on Debt and Development (APMDD), Coalition for Human Rights in Development (CHRD), 350 Pilipinas, Global Alliance for Incinerator Alternatives (GAIA) – Asia Pacific, NGO Forum on ADB, Nuclear/Coal-Free Bataan Movement, at Recourse. RNT