MANILA, Philippines – Kinastigo ni House Assistant Majority Leader Zia Alonto Adiong si Baguio City Mayor Benjamin Magalong dahil sa umano’y “irresponsable at unfair” na pahayag nito na 90% ng mga miyembro ng House of Representatives ay corrupt.
Ayon kay Adiong, hindi makatarungan na damayin ang buong institusyon at dapat ay tukuyin ang mga partikular na pangalan at magpakita ng ebidensya.
“It is quite irresponsible and unfair to just brush the entire institution with a single stroke and to say that 90 percent of the members are corrupt. We should be judged based on our individual work,” sabi ni Adiong.
Reaksyon ito sa naunang pahayag ni Magalong, dating CIDG director at naging special investigator ng Independent Commission for Infrastructure (ICI), na nagsabing malawak umano ang corruption sa Kamara dahil sa umiiral na sistema.
Giit ni Adiong, ang mga akusasyon ay dapat nakabatay sa matibay na ebidensya at hindi pangkalahatang paratang laban sa buong institusyon.
“If he has names, it’s better to name names rather than to attack the entire institution,” dagdag niya.
Sinabi rin niya na bukas ang Kamara sa mga imbestigasyon at pananagutan, ngunit dapat ay may due process at konkretong ebidensya ang anumang paratang. RNT/MND
