MANILA, Philippines – Mariing pinabulaanan ni Bicol Saro Party-list Rep. Terry Ridon ang akusasyon ni Batangas Rep. Leandro Leviste kaugnay ng alegasyong P150-milyong budget insertions.
Ayon kay Ridon, nagpapakalat ng fake news si Leviste.
“Very important yung clarification po nitong fake news at yung lying po ni Congressman Leandro Leviste. Kasi ang sinasabi na niya ngayon, paiba-iba yung statement niya eh,” sabi ni Ridon.
Idinagdag niya, “Sabi nya, he was basically referring po daw to Bicol Saro specifically, and not to me, relating to the P150-million insertions.”
Ngunit tinutukoy ni Ridon ang dalawang recorded interviews ni Leviste noong Dec. 22 kung saan sinabi nitong gumawa siya ng insertions sa P6.326-trilyong national budget para sa 2025.
Ayon kay Ridon, hindi siya bahagi ng 19th Congress at nagbalik lang noong June 30, 2025, kaya imposible na siya ang gumawa ng insertions.
Dahil dito, sinabi ni Ridon na dapat managot si Leviste sa pagkakalat ng maling impormasyon.
Idiniin din niya na ilabas muna ni Leviste ang listahan ng alleged insertions ni Cabral bago gumawa ng bagong pahayag.
“Bisperas na ng Pasko bukas: ilabas niya muna yung sinasabi niyang Cabral insertions list na hawak niya mula pa noong Sept. 4, tanggapin niya muna na nagsinungaling at nag-fake news siya na may insertions ako para sa 2025 budget bago siya gumawa ng mga bagong kuwento,” ani Ridon.
“Merry Christmas, Cong Lean!” pagtatapos ni Ridon. RNT/MND
