MANILA, Philippines – Niratipikahan ng Senado ang ilang priority measures ng administrasyon bago mag-adjourn ang 19th Congress nitong Miyerkoles ng gabi.
Kabilang sa inaprubahang bicameral conference committee reports ang Enhanced Fiscal Regime for Large-Scale Metallic Mining Act at ang Accelerated and Reformed Right-of-Way (ARROW) Act, na parehong “top priority” measures ng Legislative-Executive Development Council (LEDAC).
Galing ang bicam report sa Enhanced Fiscal Regime for Large-Scale Metallic Mining Act sa Senate Bill No. 2826 at House Bill No. 8937.
Ayon kay Senator JV Ejercito, pinapayagan ng reconciled version ang five percent royalty base sa gross output sa mines operating sa loob ng mineral reservation at isang 5-tier royalty rate na mula isang porsiyento hanggang limang porsiyento base sa margin mula sa metallic mining operations sa labas ng mineral reservations.
Inaasahang kikita ang pamahalaan ng karagdagang P6 bilyon sa buwis na makokolekta ng pamahalaan.
Tinutulan ni Senador Risa Hontiveros ang panukala dahil hindi naisali ang amendments na magtataas sa royalties ng indigenous communities na apektado ng minahan at pagpataw ng export tax upang pondohan ang National Industrialization Program.
Samantala, aprubado din sa Senado ang ARROW Act (Right of Way) sa pamamagitan ng bicam report sa disagreeing provisions ng Senate Bill No. 2821 at House Bill No. 6571.
Niratipikahan din ng Senado ang bicam report na naglalayong palawigin ang termino ng barangay at Sangguniang Kabataan (SK) officials ng apat na taon.
Pinospone din ng report ang 2025 Barangay at Sangguniang Kabataan Elections mula sa December 2025 tungo sa unang Lunes ng November 2026.
Niratipikahan din ng Senado ang bicam report sa mga sumusunod na panukala:
-Judiciary Fiscal Autonomy Act (Senate Bill No. 2982 and House Bill No. 11358);
-An Act amending Sections 134 and 168 of Republic Act No. 8424, otherwise known as the National Internal Revenue Code of 1997, as amended (Senate Committee Report No. 581 and House Bill No. 10535);
-Philippine Nuclear Energy Safety Act (Senate Bill No. 2899 and House Bill No. 9293); at
-Career Progression System for Public School Teachers and School Leaders Act (Senate Bill No. 3000 and House Bill No. 10270).
