Alyansa nangakong isusulong National Land Use Act sa pamamagitan ng political will at matatag na liderato

MANILA, Philippines – Sa isang press conference sa Malolos City ilang araw bago ang midterm elections, nangako ang mga senatorial candidate mula sa ‘Alyansa Para sa Bagong Pilipinas’ na isusulong nila ang matagal nang nakabinbing National Land Use Act (NLUA).

Iginiit nina dating Senador Ping Lacson at Tito Sotto na ang halos 30 taong pagka-antala ng NLUA ay sanhi ng mahinang liderato at kakulangan ng seryosong pagtutok mula sa dalawang kapulungan ng Kongreso.

Naniniwala sila na ang pagsasabatas nito ay mangangailangan ng matibay na political will at mga committee chairs na may malasakit sa isyu ng land use planning at sustainability.

Layunin ng NLUA na magkaroon ng komprehensibong polisiya sa paggamit ng lupa para sa pabahay, agrikultura, industriya at kalikasan. Sa kabila ng suporta mula sa Pangulo, nananatiling nakabinbin ang panukala dahil sa kakulangan ng aksiyon sa Senado at Kongreso.

Isinusulong ng Alyansa na maisabatas ito sa unang taon ng 20th Congress. Cesar Morales