MANILA, Philippines – Inanunsyo ng Anti-Money Laundering Council (AMLC) nitong Lunes na nakikipagtulungan ito sa PAGCOR para imbestigahan ang casino activities ng ilang opisyal ng Department of Public Works and Highways (DPWH) na sangkot umano sa maanomalyang flood control projects.
Aminado si AMLC executive director Matthew David na posible ang sabwatan ng ilang DPWH officials at casino employees para maglaba ng pera.
“We’re requesting PAGCOR to investigate… some public officials using the casinos as possible sites for proceeds of corruption,” ani David sa pagdinig sa Senado.
Nauna nang ibinunyag ni Senador Panfilo Lacson na ang tinaguriang “BGC Boys” — sina dating DPWH engineers Henry Alcantara, Brice Hernandez, Jaypee Mendoza, Arjay Domasig, at kontraktor na si Edrick San Diego — ay nag-cash in ng bilyon-bilyong piso sa mga casino mula 2023 hanggang 2025.
Sinabi ni David na humihingi na sila ng CCTV footage mula sa mga casino at posibleng maglabas ng freeze order o magsampa ng kaso para sa civil forfeiture at money laundering depende sa resulta ng imbestigasyon. RNT
