MANILA, Philippines – Sa Martes, Enero 27, ay sisimulan nang talakayin sa Kamara ang kontrobersiyal na anti-political dynasty bills.
Batay sa iskedyul ng House Committee on Suffrage and Electoral Reforms, bubuksan nila ang deliberasyon alas-10:00 ng umaga at ilang legal lumunaries ang mangunguna sa gagawing deliberasyon.
Ayon kay Committee Chairman Zia Alonto Adiong ng Lanao del Sur, nasa 19 anti-dynasty bills ang nairefer na sa kanyang komite.
Inaasahang madaragdagan pa ito ng isa sa oras na maihain ang panukala mula kay Marikina City Rep Miro Quimbo.
Imbitado sa gagawing deliberasyon sina dating Supreme Court (SC) chief justices Reynato C. Puno at Artemio V. Panganiban, dating Senior Associate Justice Antonio T. Carpio, at dating Associate Justice Adolfo S. Azcuña.
Dadalo rin bilang resource persons sina Commission on Elections Chairperson George Erwin M. Garcia, Philippine Bar Association president Joseph Manolo Rebano, Integrated Bar of the Philippines president Allan G. Panolong at1986 Constitutional Commission members Christian S. Monsod at Wilfrido V. Villacorta.
Inaasahang dadalo rin ang mga dean ng mga nangungunang law schools sa bansa, kinatawan mula sa academics at civil society groups.
Kumpiyansa si Adiong na matapos ang deliberasyon ay makakabuo ng isang panukala para sa anti-political dynasty na akma sa bansa.
“As Chairperson, I am fully committed to ensuring that the committee’s deliberations produce a version of the Anti-Political Dynasty Bill that is effective, legally sound, and constitutionally compliant. We will harness the collective wisdom of our distinguished resource persons to craft a measure that genuinely promotes equitable political participation, upholds meritocracy, and strengthens Philippine democracy,” paliwanag nito.
Sa ilalim ng Article II, Section 26 ng 1987 Constitution ay ipinagbabawal ang political dynasties subalit hindi malinaw kung paano ito ipatupad kaya umaasa ang Kamara na agad maisasabatas ang anti political dynasty bill na matagal nang panawagan ng ibat ibang sektor. Gail Mendoza
