MANILA, Philippines – Inaasahang dadalo sa pagdinig ng Independent Commission for Infrastructure (ICI) sa maanomalyang flood control projects ngayong Martes, Nobyembre 25 sina Quezon City District Representative Arjo Atayde at Caloocan Representative Dean Asistio.
Sa media advisory na inilabas ng komisyon, humiling sina Atayde at Asistio ng executive sessions para sa kanilang mga testimonya.
Ito ay kasunod ng paglalabas ng ICI ng panuntunan kamakailan sa livestreaming ng mga pagdinig.
Nauna na ring sinabi ni ICI spokesperson Brian Hosaka na bagamat ila-livestream ang lahat ng mga pagdinig ay maaaring humiling ng executive session kung kinakailangan.
Sa ilalim ng panuntunan, ang ICI ay maaaring magsagawa ng executive sessions sa hiling ng government agencies, offices, o units; resource persons; at witnesses.
“The ICI may grant such request if it determines that the same is meritorious with sufficient factual and legal bases and not intended to delay or frustrate the mandate of the ICI,” saad sa panuntunan. RNT/JGC
