MANILA, Philippines – Kinumpirma ni House Justice Committee chairwoman at Batangas Rep. Gerville “Jinky Bitrics” Luistro na inihahanda na ang Articles of Impeachment na pagbobotohan sa plenaryo matapos matukoy na may sapat itong probable cause para maiakyat sa plenaryo.
Kasunod ng pagboto ng may 53 na mambabatas na ang ikatlo at ika-apat na reklamo ay may probable cause, iniutos ng komite ang pagpapadala ng kopya nito sa kampo ni Vice President Sara Duterte maging sa lahat ng miembro ng Committee on Justice.
“We direct the committee to prepare the committee report along with the resolution and the articles of impeachment. We further direct the committee to transmit the same to the complainant, the respondent vice president, and the justice members.”
Ayon kay Luistro tuloy ang pagdinig ng komite sa May 4, 2026 alas 10:00 ng umaga sa People’s Center sa Batasan Complex.
Ang pinakahuling pagdinig ay sumentro sa diumano’y pagbabanta ni VP Sara sa buhay ni Ferdinand R. Marcos Jr., First Lady Liza Araneta-Marcos, at dating House Speaker Ferdinand Martin Romualdez kung siya ay mapapatay.
Ang National Bureau of Investigation (NBI) naman ay naunang nagpatunay ng “authenticity” ng naturang video na siyang isinumite sa komite at pinalabas.
Ayon kay NBI Director Melvin Matibag ang resulta ng naunang imbestigasyon ay isinumite na rin sa Department of Justice matapos makumpirma na ang pahayag ng pangalawang pangulo ay maituturing umanong “inciting to sedition and grave threats” at ito ay sapat apra sa isang “prima facie case” na nagpapalakas sa kaso at nagbibigay kasiguraduhan ng pagkabilanggo base na rin sa ebidensya.
Sa panig naman ng Commission on Audit, ay naunang kinumpirma nito ang pag-iisyu ng Notice of Disallowance para sa P73 milyon gayundin ang dagdag na disallowances na posible umanong umabot sa milyun=milyong piso.
Sa mosyon ng hiwalay na botohan sa Saballa complaint, at Cabrera complaint ay pinagtibay ng mga mambabatas na sapat ang reklamo ukol sa diumano’y maling paggamit ng pondo ng Bise Presidente, hindi maipaliwanag na yaman at mga pagbabanta sa mga opisyal ng gobyerno.
“The chair pronounces that the existence of probable cause has been declared with respect to both the Saballa complaint and the Cabrera complaint,” declared committee chair Batangas Rep. Gerville “Jinky Bitrics” ayon kay Luistro.
Ang mosyon sa pagdinig ay inihain ni Pinoy Workers Party-list Rep. Franz Vincent Legazpi dahil sa aniya’y sapat na ang mga narinig nilang ebidensya sa loob ng ilang linggong pagdinig para maiakyat na sa plenaryo ang Articles of Impeachment at madala ito sa Senado.
“Madam Chair, I think we have heard enough explanations and discussions for the past few weeks. I think it’s time to now go on to the determination of whether there is probable cause in turn for each of the complaints,” sinabi ni Legaspi sa kaniyang mosyon.
Sakaling lumusot ang articles of impeachment na ayon kay Luistro ay pagsasamahin ang dalawang reklamo sa Lunes ay isusunod naman ng mga kongresista ang pagpili sa mga kongresistang magiging miembro ng prosekusyon na siyang haharap sa mga senador na magsisilbing hukom sa impeachment trial. (Meliza Maluntag)
