MANILA, Philippines – Isinusulong ni Senador Win Gatchalian ang mabilis na pagpapatupad ng ASEAN Petroleum Security Agreement (APSA) sa gitna ng lumalalang krisis sa langis sa buong daigdig sanhi ng sigalot sa Gitnang Silangan.
Kasabay nito, ibinababala din ni Gatchalian na magpapalala pa nang husto ang krisis sa Gitnang Silangan sa katatagan o kawalan ng katiyakan sa pandaigdigang pamilihan ng enerhiya.
Binigyang-diin niya na host ang Pilipinas ng ASEAN Summit ngayong taon, kaya nasa mainam na posisyon ang bansa upang pamunuan ang rehiyon tungo sa katatagan ng enerhiya.
Aniya, dapat ilagay sa prayoridad ang pagpapatakbo sa APSA upang protektahan ang mga kasaping bansa mula sa posibleng kakulangan sa suplay.
Sinabi niya na isa sa mga posibleng intervention ang Coordinated Emergency Response Measures (CERM).
Sa ilalim nito, ang mga kasaping bansa ng ASEAN ay magtutulungan upang magpadala ng suplay ng petrolyo sa sinumang miyembrong nahaharap sa krisis o kakulangan ng hindi bababa sa 10% ng kanilang normal na pangangailangan sa loob ng 30 sunud-sunod na araw.
“Ang patuloy na tunggalian sa Gitnang Silangan ay nagpapakita kung gaano kadaling makompromiso ang suplay ng ating enerhiya dahil sa mga external shock, na banta sa paglago ng ekonomiya ng mga bansang kasapi ng ASEAN,” ani Gatchalian, na siyang chairman ng Senate PROTECT ad hoc committee.
Nilagdaan noong 2009, ginagamit ng APSA ang prinsipyo ng mutual aid o pagtutulungan sa pagitan ng mga miyembrong bansa ng ASEAN sa panahon ng emergency sa enerhiya upang mapanatiling matatag ang suplay ng petrolyo.
“Bilang host ng ASEAN Summit ngayong taon, mayroon tayong plataporma para gawing buhay at aktibo ang matagal nang kasunduan na ito,” dagdag pa niya. Ernie Reyes
