Manila, Philippines – Isa ang kambal ni Aga Muhlach na si Atasha sa biktima ngayon ng fake news sa social media.
Ayon nga sa pagkalat ng ilang vlogs, nabuntis daw ni Pasig City Mayor Vico Sotto si Atasha, ang TV host at “Eat Bulaga” Dabarkads.
Mismong si Atasha na ang nagsabing fake news ang naturang balita base sa panayam sa kanya ni Ogie Diaz sa YouTube channel nito.
“Nagtataka rin ako. Hindi ko alam ‘yun kasi unang-una hindi pa po kami nagkikita,” sabi ni Atasha.
Sabi naman ni Mama Ogs, “So in other words, ‘yun pong mga pinapanood ninyo na kaagad-agad napaniwalaan ninyo, mga fake news po ‘yan.
“Dahil usung-uso po ‘yan sa YouTube, yung mga nag-iimbento ng mga balita, tapos wala naman silang mga sources,” aniya pa.
Samantala, nagbigay din ng paalala at warning ang TV host-comedian na si Vice Ganda sa patuloy na pagpapakalat ng fake news sa pamamagitan ng socmed.
Sa isang episode ng EXpecially For You ng It’s Showtime, kung saan sumalang ang dating magdyowang sina CJ at Zach ay naibahagi nilang nakaka-relate raw sila sa mga inspirational qoutes na nababasa nila sa social media.
Sabi ng searcher na si CJ, ilan sa mga nabasa niyang inspirational quotes sa socmed ay galing daw mismo kay Vice Ganda.
Kasunod nga nito ay nagsalita si Vice at nagpaliwanag tungkol sa mga quotes na nakapangalan sa kanya na ang iba’y hindi naman talaga niya sinabi o ipinost.
“Ito ang pagkakamali ng marami. Katulad ng mga nababasa n’yo na quote tungkol sa akin, by the way hindi lahat ng mga nababasa ninyong quote sa Facebook ay totoong nanggaling sa akin,” paglilinaw ni Vice.
“Ang dami kong nababasa na Vice Ganda quote…’kailan ko ‘to sinabi, kailan ko ito na tweet?’
“Tatawag pa ako sa social media team ko, ‘na tweet ko ba to?’
“‘Check niyo nga bakit ganito?’ Tapos sasabihin nila, ‘fake yan teh,’ tapos makikita mo ang daming comments,” paglilinaw pa ni Vice.
“Tapos ‘yung comment ko sa lahat ng issues, (napapaisip ako) nag-comment ba ako diyan? Nag-comment ba ako kay Dennis Trillo? ‘Yung ganu’n, iyung ang dami talaga.
“Hindi lahat ng nababasa niyong quote na nakalagay ay Vice Ganda totoo po ‘yun, kaya bahala po kayo kung gusto niyong magpaniwala,” sey pa ng misis ni Ion Perez. Rommel Placente
