MANILA, Philippines – Naglaan ang Australia ng AUD45 milyon o humigit-kumulang P2 bilyong grant para suportahan ang economic growth ng Pilipinas, kabilang ang mga proyekto sa renewable energy, digital economy at infrastructure.
Pormal na inilunsad nitong Martes ang Promoting Growth, Resilience, Economic Stability and Sustainability in the Philippines (PROGRESS), isang limang taong programa na tatakbo mula 2026 hanggang 2031.
Ayon kay Australian Assistant Minister for Foreign Affairs and Trade Matt Thistlethwaite, layunin ng programa na suportahan ang economic reforms, mapabuti ang ease of doing business at makahikayat ng mas maraming investment at trade.
Kabilang sa mga paunang prayoridad na tinukoy ng mga ahensya ng gobyerno ang renewable energy development, offshore wind industry, infrastructure development at pagtatatag ng carbon market. Kasalukuyan pang tinutukoy ng dalawang gobyerno ang mga partikular na proyektong popondohan.
Target din ng PROGRESS na palawakin ang economic participation ng kababaihan, persons with disabilities at marginalized groups.
Ang programa ay bahagi ng mas malawak na Australia-Philippines development partnership na nakatuon sa inclusive at sustainable economic growth, kabilang ang renewable energy, infrastructure, telecommunications at digitalization. RNT
