Inilahad ni Bernardo ang pahayag sa cross-examination ng depensa sa Sandiganbayan noong Oktubre 29 kaugnay ng pagdinig sa petition for bail ni Romualdez sa plunder case na kinakaharap nito.

Sa pagtatanong ni defense lawyer Thea Daep, sinabi ni Bernardo na tumanggap siya ng pinansyal na pakinabang o tinatawag niyang “balato” mula sa ilang infrastructure projects na may iba’t ibang proponents.

Gayunman, sinabi niyang wala siyang personal na project transaction o financial arrangement kay Romualdez.

Nang tanungin kung nakibahagi ang dating Speaker sa mga pag-uusap tungkol sa project commitments, sumagot si Bernardo ng, “Wala po.”

Kinumpirma rin niya na sa kanyang mga affidavit ay hindi niya tinukoy si Romualdez bilang project proponent o bilang kausap sa mga negosasyon tungkol sa commission o kickback.

Ayon kay Bernardo, nabanggit lamang niya si Romualdez sa isang affidavit kaugnay ng birthday celebration ng anak ni dating DPWH Secretary at ngayo’y Sen. Mark Villar, kung saan kabilang ang dating Speaker sa mga dumalo. Inilarawan niya itong isang social event.

Sinabi rin ni Bernardo na wala siyang personal na kaalaman sa anumang commitment-fee scheme kaugnay ng DPWH projects sa Leyte.

Sa apat na akusado sa kasong tinatalakay sa hearing, sinabi niyang ang nalalaman niyang project transactions ay yaong iniuugnay niya kay dating Ako Bicol Party-list Rep. Zaldy Co sa Bulacan.

Hindi na rin kinross-examine ng depensa ang isa pang prosecution witness na si Edrick San Diego dahil walang alegasyon laban kay Romualdez sa kanyang judicial affidavit.

Si San Diego, dating driver ni dating DPWH Bulacan First District Engineer Henry Alcantara, ay nagtestigo tungkol sa umano’y paghahatid ng mga kahon ng pera sa ilang lugar at personalidad.

Sinabi rin ni Bernardo na ang mga iregular na arrangement sa infrastructure projects na kanyang nalalaman ay umiiral na noong 2002, nang siya ay district engineer sa Maynila—dalawang dekada bago naging Speaker si Romualdez noong Hulyo 2022.

Ayon sa kanya, naglalaro sa 10% hanggang 25%, at sa ilang pagkakataon ay umaabot sa 30%, ang umano’y commission na hinihingi ng ilang project proponents. Sinabi rin niyang maaaring kabilang sa proponents ang mga mambabatas, local officials, contractors at private individuals.

Kinumpirma rin ni Bernardo na ang DPWH ang nangangasiwa sa bidding ng mga proyekto habang may papel ang Department of Budget and Management sa pagpapalabas ng pondo. Ayon sa kanyang testimonya, walang papel ang Office of the Speaker sa bidding process o sa pagpapalabas ng Special Allotment Release Orders.

Gayunman, ang testimonya ni Bernardo sa cross-examination ay bahagi lamang ng nagpapatuloy na pagdinig at hindi katumbas ng pinal na desisyon ng Sandiganbayan sa mga kasong kinakaharap ni Romualdez. RNT

The post Bernardo: Walang hininging proyekto o kickback sa kanya si Romualdez first appeared on Remate Online.

CEBU – Magdaragdag ng pondo ang United States para sa security cooperation sa Pilipinas upang mapabilis ang modernization ng Armed Forces of the Philippines (AFP), ayon kay US Secretary of War Pete Hegseth.

Inanunsyo ni Hegseth ang dagdag na suporta kasunod ng pakikipagpulong niya kay Defense Secretary Gilberto Teodoro Jr. sa Cebu nitong Miyerkules. Hindi naman tinukoy ng US Department of War kung magkano ang karagdagang pondo.

Ayon sa US readout, layunin ng dagdag na pondo na mapabilis ang AFP modernization at mapahusay ang interoperability ng militar ng dalawang bansa sa kahabaan ng First Island Chain.

Tinalakay rin nina Hegseth at Teodoro ang progreso sa security cooperation, modernization ng alliance at iba pang defense initiatives ng Pilipinas at US.

Nagkasundo rin silang magsagawa ng alliance command and control modernization sprint upang mapahusay ang real-time coordination ng dalawang bansa at mapatatag ang kanilang defense cooperation.

Kasabay nito, binigyang-diin ng dalawang opisyal ang progreso sa paggamit at pagpapaunlad ng mga lokasyon sa ilalim ng Enhanced Defense Cooperation Agreement (EDCA), kabilang ang investments sa critical infrastructure at storage facilities sa Pilipinas.

Nasa Cebu si Hegseth para sa 20th ASEAN Defense Ministers’ Meeting at 13th ADMM-Plus na ginanap Oktubre 28 at 29. Dave Medina

The post US, inanunsyo dagdag-pondo para pabilisin AFP modernization first appeared on Remate Online.

MANILA, Philippines – Inaasahan ng NLEX Corporation ang pagdagsa ng mga motorista patungong hilaga simula Biyernes ng hapon, Oktubre 30, kasabay ng pag-uwi sa mga lalawigan para sa Undas 2026.

Ayon kay NLEX Corporation AVP for Traffic Operations Robin Ignacio, posibleng magsimula ang mabigat na northbound traffic pagsapit ng early afternoon ng Biyernes at magpatuloy hanggang gabi.

Inaasahan ding muling dadami ang mga sasakyan mula madaling araw hanggang hapon ng Sabado.

Sa ngayon, sinabi ng NLEX na mabilis pa rin ang daloy ng trapiko, partikular sa northbound lanes.

Tinatayang tataas ng 3% hanggang 5% ang traffic volume mula Oktubre 29 hanggang Nobyembre 3 kumpara sa normal daily average.

Gayunman, maaaring lumampas sa 20% ang pagtaas ng hourly traffic volume sa mga oras na pinakamarami ang bumibiyahe.

Nag-deploy na rin ang NLEX ng humigit-kumulang 1,500 personnel, kabilang ang toll tellers, patrol teams, security personnel, traffic marshals at incident response teams, bilang paghahanda sa dagsa ng mga motorista ngayong Undas. Santi Celario

The post Undas Exodus sa NLEX, asahan sa Biyernes ng hapon first appeared on Remate Online.

CEBU – Inakusahan ng China ang Pilipinas na umano’y “naglagay ng maraming hadlang” sa paglahok nito sa ASEAN Defense Ministers’ Meeting-Plus (ADMM-Plus) sa Cebu, bagay na itinanggi naman ni Defense Secretary Gilberto Teodoro Jr.

Ayon sa spokesperson ng Chinese defense ministry, may ilang opisyal umano sa Pilipinas na gumamit ng kanilang posisyon upang hadlangan ang partisipasyon ng Beijing sa pagpupulong.

Sinabi rin ng China na ang naturang hakbang ay umano’y salungat sa ASEAN principle of consensus at sa diwa ng openness at inclusiveness ng regional bloc.

Sa ADMM-Plus, defense attaché lamang ng Chinese Embassy sa Manila na si Senior Captain Yang Lei ang ipinadala ng Beijing, habang ilang dialogue partners gaya ng United States, Japan at Australia ay kinatawan ng kanilang defense chiefs.

Tugon ni Teodoro, posisyon lamang iyon ng China at hindi ng ASEAN.

“It is China’s position; it is not ASEAN’s position,” ani Teodoro.

Dagdag niya, nabigyan naman ang China ng pagkakataong ihayag ang posisyon nito sa pagpupulong.

Nauna nang inanunsyo ng Chinese defense ministry na si Yang ang kakatawan sa bansa sa ADMM-Plus at nakatakdang makipagpalitan ng pananaw sa ibang kalahok hinggil sa dialogue, mutual trust at ASEAN centrality.

Natapos nitong Huwebes ang dalawang araw na ASEAN defense meetings sa Cebu sa gitna ng patuloy na tensyon sa South China Sea at mas malawak na usapin sa regional security cooperation. Dave Medina

The post China: PH ‘naglagay ng hadlang’ sa pagdalo sa ASEAN defense meet; Teodoro kumontra first appeared on Remate Online.

MANILA, Philippines – Iginiit ng dating aide ni ex-Department of Public Works and Highways Undersecretary Roberto Bernardo na naghatid siya ng mga kahon at maleta kina suspended Sen. Jinggoy Estrada, dating Sen. Bong Revilla, dating DPWH Secretary Manuel Bonoan at iba pang opisyal.

Sa pagdinig sa Sandiganbayan Fifth Division nitong Huwebes, sinabi ni Vergel Nino Garcia na noong Nobyembre 2024 ay naghatid siya ng 12 kahon sa Artiaga Building sa San Juan City na para umano kay Estrada, sa utos ni Bernardo.

Gayunman, nilinaw ni Garcia na hindi niya nakita ang laman ng mga kahon at wala rin silang kinuhang litrato o video ng delivery.

Ayon sa testigo, mga lalaki mula sa gusali ang kumuha ng mga kahon at ipinasok ang mga ito sa loob. Sinabi rin niyang nakita niya umano si Estrada sa gusali bago niya ini-report kay Bernardo na natapos ang delivery.

Ikinuwento rin ni Garcia na nakapaghatid umano siya ng hanggang 12 kahon kay Revilla, 15 kahon kay Bonoan, isang kahon at paper bag kay dating DPWH Undersecretary Maria Catalina Cabral, at walong maleta at 15 kahon kay dating Education Undersecretary Trygve Olaivar.

Nagbigay na rin noon si Garcia ng kahalintulad na testimonya sa hiwalay na malversation case na kinasasangkutan ni Revilla.

Samantala, tumestigo rin si dating DPWH-NCR director Gerard Opulencia na mayroon umanong 5% hanggang 10% “pasasalamat” para sa ilang DPWH officials bukod pa sa sinasabing 25% “commitment fee.”

Sinabi ni Opulencia na inatasan umano siya ni Bernardo na maghanda ng P360 milyon na “commitment,” na kalaunan ay nalaman niyang para umano kay Estrada. Ang mga alegasyong ito ay bahagi pa ng pagdinig at hindi pa pinal na hatol ng korte.

Nahaharap si Estrada sa P573-milyong plunder case kaugnay ng umano’y kickbacks mula sa flood control projects. Ipagpapatuloy ng Sandiganbayan Fifth Division ang pagdinig sa Nobyembre 4. RNT

The post Ex-aide ni Bernardo: Mga kahon, maleta inihatid kina Estrada, Revilla, Bonoan first appeared on Remate Online.

MANILA, Philippines – Wala pang nakikitang pangangailangan ang Philippine National Police (PNP) na maglabas ng “wanted poster” para kay Sen. Ronald “Bato” dela Rosa habang nagpapatuloy ang manhunt operation laban sa senador.

Ayon kay PNP spokesperson Police Col. Allen Rae Co, kilala naman ng publiko ang mukha ni Dela Rosa at malawak na ring naipabatid ang P50 milyong reward para sa impormasyong hahantong sa kanyang pagkakaaresto.

“Hindi sa hindi magawa. We do not see any need for now. Kasi unang-una, sino bang hindi nakakakilala sa itsura ni Senator Bato?” ani Co.

Gayunman, sinabi niyang patuloy na pinag-aaralan ang posibilidad na maglabas ng wanted poster kung matutukoy na makatutulong ito sa paghahanap at pag-aresto sa senador.

Tumanggi naman ang PNP na magbigay ng detalye tungkol sa kanilang operasyon dahil maaaring makompromiso umano nito ang manhunt at malagay sa panganib ang mga operatiba.

Ipinagtanggol din ni Co ang pagtukoy ng PNP kay Dela Rosa bilang “armed and dangerous,” na iniuugnay ng pulisya sa 90 baril ng senador na sinabi nitong hindi pa accounted for.

Si Dela Rosa, dating PNP chief, ay hinahanap kaugnay ng arrest warrant na inilabas ng International Criminal Court (ICC) sa kasong crimes against humanity na may kaugnayan sa war on drugs ng administrasyon ni dating Pangulong Rodrigo Duterte.

Inaakusahan siya ng ICC prosecutors bilang umano’y co-perpetrator sa mga nasabing krimen.

Nauna namang sinabi ng Department of the Interior and Local Government na posibleng nagtatago si Dela Rosa sa Mindanao sa proteksyon umano ng isang “armed and powerful group,” ngunit hindi nito tinukoy ang naturang grupo. Santi Celario

The post PNP: ‘Wanted poster’ ni Bato ‘di pa kailangan first appeared on Remate Online.

MANILA, Philippines – Nanawagan ang 35 business at advocacy groups sa Kongreso na alisin sa panukalang P7.2-trilyong 2027 national budget ang umano’y congressional insertions na walang malinaw na technical basis.

Sa joint statement, hinimok ng mga grupo ang liderato ng Senado at Kamara na tiyaking transparent at may sapat na dokumentasyon ang lahat ng pondong nakapaloob sa budget.

Ayon sa kanila, mahigit P180 bilyon umano ang idinagdag sa Department of Public Works and Highways (DPWH) allocations sa House-approved General Appropriations Bill sa pamamagitan ng Budget Amendments and Review Subcommittee.

Sinabi ng mga grupo na batay sa pagsusuri ng independent budget watchdogs, saklaw ng mga dagdag na alokasyon ang hindi bababa sa 6,000 proyekto, kabilang umano ang lump-sum allocations para sa multi-purpose buildings at access at bypass roads.

Ikinabahala rin nila ang umano’y pagbabawas ng humigit-kumulang P130 bilyon mula sa foreign-assisted projects, P9.5 bilyon mula sa calamity funds, P1.76 bilyon mula sa EDSA Busway at P4.9 bilyon mula sa health programs upang pondohan ang ibang items.

Kabilang sa kanilang mga panawagan ang pagpapanumbalik ng naturang pondo, paglalathala ng lahat ng budget amendments at hindi pagtanggap ng mga bagong item sa bicameral conference committee.

Iginiit din nilang dapat livestreamed ang bicam proceedings at walang blank o lump-sum entries sa final report.

Kabilang sa mga lumagda sa pahayag ang Philippine Chamber of Commerce and Industry, Makati Business Club, Management Association of the Philippines, Employers Confederation of the Philippines, FINEX, PHILEXPORT at iba pang business at civil society organizations.

Nauna nang sinabi ng People’s Budget Coalition na nakakita ito ng mahigit P1 trilyong halaga ng umano’y “red flags” sa House-approved 2027 budget.

Samantala, sinabi ng Malacañang na hindi awtomatikong mali ang budget insertions kung ang pondo ay ginagamit nang tama para sa lehitimong proyekto at hindi napupunta sa bulsa ng mga opisyal. Dave Medina

The post 35 business, advocacy groups ipinatatanggal ‘insertions’ sa P7.2-T budget first appeared on Remate Online.

CEBU – Nanawagan si Defense Secretary Gilberto Teodoro Jr. sa mga miyembro ng ASEAN at dialogue partners nito na igalang ang international law, kabilang ang United Nations Convention on the Law of the Sea (UNCLOS), at itakwil ang banta o paggamit ng puwersa sa paglutas ng mga alitan.

Ginawa ni Teodoro ang pahayag sa kanyang opening remarks sa 13th ASEAN Defense Ministers’ Meeting-Plus (ADMM-Plus) sa Cebu nitong Huwebes.

Ayon kay Teodoro, kailangang nakabatay sa mutual respect at pagsunod sa international law ang defense cooperation ng mga kalahok na bansa.

Binigyang-diin niya ang mga prinsipyo ng paggalang sa sovereignty at territorial integrity, non-interference sa internal affairs, peaceful settlement of disputes at pagtalikod sa threat o use of force.

Kasabay nito, nanawagan din ang kalihim na ipagpatuloy ang pagpapalakas ng defense cooperation sa ilalim ng ADMM-Plus framework.

Kabilang sa kanyang binigyang-diin ang proteksyon sa critical underwater infrastructure, pagpapalakas ng people-to-people ties, at mas malawak na kooperasyon sa food at energy security sa gitna ng supply chain disruptions at mga armadong tunggalian sa ibang bansa.

Nanawagan din si Teodoro para sa mas malakas na proteksyon sa migrant workers at seafarers, partikular sa mga ASEAN nationals na maaaring maipit sa conflict zones.

Host ang Pilipinas ng 20th ASEAN Defense Ministers’ Meeting at 13th ADMM-Plus sa Cebu mula Oktubre 28 hanggang 29.

Kabilang sa walong dialogue partners ng ADMM-Plus ang Australia, China, India, Japan, New Zealand, South Korea, Russia at United States. Dave Medina

The post Teodoro sa ASEAN, partners: Igalang UNCLOS, itakwil paggamit ng puwersa first appeared on Remate Online.

MANILA, Philippines – Nagpaalala ang Philippine National Police-Highway Patrol Group (HPG) sa mga motorista na tiyakin ang kaligtasan sa kalsada ngayong Undas 2026 kasabay ng inaasahang pagdami ng mga biyahero.

Ayon kay HPG chief Police Brig. Gen. Joyce Patrick Sangalang, 761 HPG personnel ang ikakalat sa buong bansa upang tumulong sa traffic management, highway security at assistance sa mga motorista.

Susuportahan sila ng 586 force multipliers, habang ide-deploy din sa field ang administrative personnel dahil naka-full alert ang HPG.

Pinaalalahanan ang mga motorista na magparada sa maliwanag at ligtas na lugar, tiyaking naka-lock ang mga pinto at bintana ng sasakyan, at huwag iwan ang susi sa loob ng kotse o motorsiklo.

Inirekomenda rin ang paggamit ng anti-theft devices gaya ng steering-wheel locks, motorcycle handlebar locks, alarms at GPS trackers.

Bago bumiyahe, dapat ding suriin ang battery, ilaw, preno, gulong, makina at fuel supply ng sasakyan upang maiwasan ang aberya at aksidente.

Pinaalalahanan din ang mga driver na huwag magmaneho kapag inaantok, lasing o nasa ilalim ng impluwensiya ng ilegal na droga.

Ayon sa HPG, umabot sa 118,600 road crash incidents ang naitala mula Enero hanggang Oktubre 15 ngayong taon.

Pinakamarami rito ang iniuugnay sa overspeeding na may 37,000 insidente, kasunod ang overtaking, self-accidents, drunk driving, paggamit ng cellphone habang nagmamaneho at mechanical factors.

Pinakamaraming sasakyang sangkot sa road crashes ang motorsiklo na umabot sa 57,700 insidente.

Nakapagtala rin ang HPG ng 3,816 nasawi dahil sa road crashes sa parehong panahon. Santi Celario

The post Road safety tips, ipinaalala ng HPG sa Undas first appeared on Remate Online.