MAYNILA — Nagpahayag si Senator Camille Villar ng matinding kalungkutan at pag-aalala kaugnay ng trahedyang pamamaril sa San Jose National High School sa Tacloban City na ikinasawi ng tatlong estudyante at ikinasugat ng ilan pa. Nanawagan ang senador ng agarang at magkakaugnay na hakbang upang higit na maprotektahan ang mga batang Pilipino sa loob ng mga paaralan.

“Bilang isang ina at bilang senador, labis akong nasasaktan sa nangyaring trahedyang ito. Walang magulang ang dapat makatanggap ng balitang ang anak na pumasok sa paaralan upang mag-aral ay hindi na makakauwing muli. Nakikiisa ako sa panalangin at pakikiramay sa mga pamilya ng mga nasawi, sa mga sugatang estudyante, sa kanilang mga kaklase, mga guro, at sa buong komunidad ng Tacloban sa gitna ng napakahirap na panahong ito,” ani Villar.

Binigyang-diin ng pinakabatang senador ng ika-20 Kongreso na ang mga paaralan ay dapat manatiling ligtas na lugar kung saan malayang nakapag-aaral at nangangarap ang mga kabataan nang walang takot sa karahasan.

“Habang nagpapatuloy ang masusing imbestigasyon, mahalagang matukoy ang buong katotohanan sa likod ng insidenteng ito. Ngunit kasabay nito, hindi natin maaaring hintayin na may susunod pang trahedya bago tayo kumilos”, dagdag niya.

Nanawagan din si Villar sa Department of Education (DepEd), mga lokal na pamahalaan, mga law enforcement agencies, at mga administrador ng paaralan na muling suriin at palakasin ang umiiral na mga patakaran sa kaligtasan sa paaralan, mga alituntunin laban sa bullying, counseling services, at mga intervention program para sa mga kabataang nangangailangan ng agarang gabay at suporta.

“Kailangan nating palakasin ang koordinasyon sa pagitan ng mga paaralan, komunidad, lokal na pamahalaan, at mga law enforcement agencies. Ang responsibilidad ng pagprotekta sa ating mga anak ay hindi maaaring nakaatang lamang sa iisang institusyon. Nangangailangan ito ng isang whole-of-government at whole-of-community approach,” ani Villar. RNT

The post Camille Villar nanawagan ng mas matibay na seguridad sa mga paaralan at pinalawak na suporta sa mental health matapos ang pamamaril sa Tacloban first appeared on Remate Online.

Mariing kinondena ni Senator Mark A. Villar ang malagim na insidente ng pamamaril sa loob ng San Jose National High School sa Tacloban City na ikinasawi ng tatlong katao at ikinasugat ng lima pa, na aniya’y isang walang saysay na karahasan na walang puwang sa anumang institusyong pang-edukasyon.

“Mariin kong kinokondena ang karumal-dumal at walang saysay na pamamaril na naganap sa loob ng San Jose National High School. Ang pagkawala ng mga buhay sa isang lugar na dapat ay ligtas na kanlungan ng pag-aaral at paghubog ng kinabukasan ay isang trahedyang hindi dapat mangyari. Lubos akong nakikiramay sa mga pamilya ng mga nasawi at taimtim na ipinagdarasal ang agarang paggaling ng mga nasugatan,” ani Senator Villar.

Binigyang-diin din ni Senator Villar ang pangangailangang magbigay ng agarang tulong, psychosocial support, at iba pang kinakailangang serbisyo para sa mga biktima, kanilang mga pamilya, at sa buong komunidad ng paaralan na naapektuhan ng insidente.

“Walang magulang ang dapat mangamba sa kaligtasan ng kanilang anak habang ito ay nasa paaralan. Wala ring estudyanteng dapat matakot na baka hindi siya makauwi nang ligtas matapos ang isang araw ng pag-aaral. Ang ating paaralan ay dapat manatiling ligtas na lugar kung saan malayang makapag-aaral, makapangangarap, at makapaghahanda para sa kinabukasan ang ating mga kabataan. Ang trahedyang ito ay isang masakit na paalala na kailangan pa nating paigtingin ang ating mga hakbang upang maprotektahan ang ating mga komunidad laban sa karahasan,” dagdag niya.

Ipinahayag din ni Senator Villar ang kanyang suporta sa agarang pagbibigay ng tulong, counseling, at iba pang kinakailangang serbisyo para sa mga biktima, kanilang mga pamilya, at sa buong komunidad ng paaralan na naapektuhan ng insidente.

“Sa gitna ng pagdadalamhati, kailangan nating magkaisa sa pagsuporta sa mga biktima at muling pagtibayin ang ating sama-samang responsibilidad na tiyaking ang bawat paaralan ay mananatiling ligtas na lugar ng pagkatuto, pag-asa, at oportunidad” pagtatapos ni Senator Villar. RNT

The post Sen. Villar kinondena Tacloban school shooting incident; kaligtasan ng mga estudyante, guro siguruhin agad first appeared on Remate Online.

REAL, Quezon — Naniniwala si Vice Mayor at dating Mayor Diana Abigale Diestro-Aquino na nananatili sa tamang direksyon ang pag-unlad ng bayan ng Real kahit nagkaroon ng pagbabago sa liderato, dahil ipinagpapatuloy pa rin ng kasalukuyang administrasyon ang mga programang inilatag sa mga nakaraang taon.

Sa isang ambush interview ng Manila City Hall Press Club sa kanyang tahanan sa Real nitong Linggo, sinabi ni Aquino na hindi nabago ang pangunahing balangkas ng Comprehensive Development Plan ng munisipyo na nagsisilbing gabay sa pagpapatupad ng mga proyekto at programa ng lokal na pamahalaan.

Ayon sa bise alkalde, may ilang maliliit na pagbabago man sa plano, nananatili pa rin ang pangunahing layunin nito na itaguyod ang kaunlaran sa imprastraktura, turismo, serbisyong panlipunan, at pangangalaga sa kalikasan.

“Hindi naman talaga nagbago ang Comprehensive Development Plan ng Real. May mga kaunting pagbabago lamang pero ipinagpapatuloy pa rin nito ang mga programang dati nang naisakatuparan,” ani Aquino.

Sinabi niya na ang pagpapatuloy ng mga programa ay mahalaga upang hindi masayang ang mga naunang pagsisikap at pondong inilaan para sa mga proyektong makikinabang ang mga residente.

Binigyang-diin din ni Aquino na ang pag-unlad ng isang bayan ay hindi dapat nakaangkla sa personalidad ng mga pulitiko kundi sa pangmatagalang plano na nagsisilbing gabay ng bawat administrasyon.

Dahil dito, nagpahayag siya ng kumpiyansa na magpapatuloy ang mga proyekto at inisyatibang magpapalakas sa ekonomiya, turismo, at serbisyong pampubliko ng bayan.

Matatandaang nagsilbi si Aquino bilang alkalde ng Real mula 2016 hanggang 2022 bago mahalal bilang bise alkalde. Bago ito, nagsimula ang kanyang karera sa serbisyo publiko bilang Pangulo ng Sangguniang Kabataan Provincial Federation ng Quezon.

Ayon kay Aquino, mahalagang mapanatili ang direksyon ng mga programang pangkaunlaran upang masigurong tuluy-tuloy ang paghahatid ng serbisyo sa mamamayan anuman ang maging resulta ng halalan.

“Ang mahalaga ay nagpapatuloy ang mga programang nakakatulong sa mga tao. Ang kaunlaran ay hindi dapat napuputol sa bawat pagpapalit ng liderato,” aniya.

Dahil dito, nananatiling positibo ang dating alkalde na magtutuloy-tuloy ang pag-unlad ng Real habang hinaharap nito ang mga susunod na hamon at oportunidad para sa mas magandang kinabukasan ng mga residente. JAY Reyes

The post Dating Alkalde ng Real, kumpiyansang nasa tamang direksyon pa rin ang bayan first appeared on Remate Online.

MAYNILA — Mas lumalakas ang suporta ng pribadong sektor sa pagsusulong ng electric vehicles (EVs) sa Pilipinas matapos makiisa ang iba’t ibang automotive brands sa kampanya ng Department of Energy (DOE) para sa mas malinis at makabagong transportasyon.

Ito ang naging sentro ng ika-10 Philippine International Motor Show (PIMS) 2026 kung saan ipinakita ng mga pangunahing global automotive manufacturers ang kanilang mga pinakabagong electric mobility solutions sa World Trade Center sa Maynila.

Ayon kay Patrick Aquino, mahalagang plataporma ang PIMS upang maipakita ang mga makabagong teknolohiya na makatutulong sa pagpapabilis ng paglipat ng bansa sa mas episyente at environment-friendly na transportasyon.

Naging kapansin-pansin sa apat na araw na expo ang malakas na presensya ng mga EV manufacturers, kabilang ang VinFast, na nagdala ng iba’t ibang electric vehicle models para sa merkado ng Pilipinas.

Kabilang sa mga ipinakita ng kumpanya ang VF 3, VF 6, VF 7, VF 9, Herio Green at Limo Green, na umani ng interes mula sa mga bisita at potensyal na mamimili.

Isa sa mga naging tampok sa kanilang display ang MPV 7, isang fully electric seven-seater vehicle na may tinatayang saklaw na hanggang 450 kilometro sa isang full charge at kakayahang mag-fast charge sa loob ng humigit-kumulang 30 minuto.

Ayon naman kay Antonio Zara III, bahagi ng kanilang paglahok sa PIMS 2026 ang pagpapakita ng suporta sa mga programa ng pamahalaan na naglalayong pabilisin ang pag-adopt ng electric mobility sa bansa.

Sa kabuuan, ipinakita ng PIMS 2026 na hindi lamang pamahalaan kundi maging ang industriya ng sasakyan ay nakikiisa sa pagtataguyod ng mas malinis, mas matipid, at mas napapanatiling sistema ng transportasyon para sa mga Pilipino.

Batay sa datos ng International Energy Agency, maaaring umabot sa 45 porsiyento ng kabuuang vehicle sales sa Pilipinas ang electric vehicles pagsapit ng 2035 kung magpapatuloy ang suporta sa electric mobility at pagpapalawak ng charging infrastructure sa bansa.

The post EV brands, nakikiisa sa pagtulak ng DOE para sa mas malawak na paggamit ng electric vehicles sa bansa first appeared on Remate Online.

Ang OBS ay isang survey na isinasagawa na may kaugnayan sa transparency, accountability at public participation ng 86 bansa sa buong mundo.

Ang naturang survey ay isinagawa noong 2025 habang ang naka-upo pang Department of Budget and Management Secretary ay si Secretary Amenah Pangandaman.

Sa kabila ng pagbibitiw sa puwesto ni Pangandaman ito ay hindi lamang niya tagumpay at kararangaln kundi tagumpay at karangalan din ito ng bansang Pilipinas at bawat isang mamamayang Filipino.

Ang Pilipinas ay ranked 1st sa Southeast Asia at 10th place naman sa globally for budget transparency na kung saan ang fiscal transparency score ay 76 mula sa 100.

Ito ang ikalawang pagkakataon na ang Pilipinas ay nanguna sa budget transparency na kung saan noong 2023 ang unang pagkakataon ng pagkakatala sa ilalim pa ng liderato ni Pangandaman.

Ang OBS  ay ang world’s only independent, comparative assessment of central government budget accountability na pinangangasiwaan ng International Budget Partnership (IBP);

na siyang otomatikong nagsasawaga ng evaluation ng national budget processes upang masukat at mapaganda pa ang mas magandang pamamahala sa buong mundo. RNT

The post Pinas una pa rin sa budget transparency sa panahon ni Pangandaman – Intl Budget Survey first appeared on Remate Online.

Sumali ang mga ama at kanilang mga pamilya sa “Fun Run for Tatay” sa Villar Children’s Farm sa Sabado, isang araw bago ang Araw ng mga Ama, na nagdiriwang ng kalusugan at ang hindi matutumbasang papel ng mga ama sa mga pamilyang Pilipino.

Inorganisa ng Villar Foundation, ang kaganapan ay nakakuha ng higit sa 3,000 kalahok para sa isang umaga ng pagtakbo, pagsasama ng pamilya, at mga aktibidad na nagbibigay-pugay sa mga ama at kanilang mga kontribusyon sa kanilang mga tahanan at komunidad.(CESAR MORALES)

The post Fun Run para kay Tatay first appeared on Remate Online.

MANILA, Philippines — Ginagawang mga pampublikong parke at community spaces ng Department of Environment and Natural Resources (DENR) ang mga nabawing river easement areas bilang bahagi ng programa sa rehabilitasyon ng Manila Bay.

Sa magkahiwalay na pagpapasinaya sa Bataan at Pampanga noong Hunyo 14, ipinakita ni Environment Secretary Juan Miguel Cuna ang mga proyektong naglalayong gawing kapaki-pakinabang na pampublikong lugar ang mga dating hindi nagagamit na pampang ng ilog.

Sa Barangay Bagumbayan, Bataan, pinasinayaan ang 290-meter na “Disiplina Park,” isang linear park na may mga halaman, ilaw, bukas na daanan, at solar-powered streetlights.

“Ang 290 meter na ginawa nating linear park dito po ay bahagi po ng Manila Bay Rehabilitation natin. At ayon po sa kautusan ng ating Pangulo, Ferdinand R. Marcos Jr., gusto niya po ang gawin ng lahat ng mga ahensya ng gobyerno, tumulong, gumawa ng mga hakbang, para ‘yung mga komunidad po natin mas maging resilient, mas maging maayos, para gumanda rin ang buhay ng ating mga kababayan,” ani Cuna.

May nakatanim na 1,200 puno sa parke kabilang ang kawayan, ornamental shrubs, at palm trees upang makatulong sa erosion control at makapagbigay ng lilim. Inilipat din sa 1 Bataan Housing project ang mga pamilyang dating nakatira sa easement area.

Sa Pampanga naman, itinampok ng DENR ang pagbabago ng dating hindi nagagamit na pampang ng Caliano River sa Sasmuan tungo sa 1,300-square-meter na Sasmuan Linear Park.

“Ang 1,300-sqm Sasmuan Linear Park, dating patay na pampang, ngayon buhay na tambayan ng komunidad. May walkway, pavilion, picnic spots at open spaces para sa lakad at pahinga,” ayon sa DENR.

Natapos ang proyekto noong ikalawang quarter ng 2025 at nagtatampok ng concrete pathway, pavilion, comfort room, mga mesa at upuan, at iba pang pampublikong pasilidad.

“Gaya ng sabi po ni Mayor (Catalina Cabrera) sa akin kanina ay wala pong plaza dito sa Sasmuan, so masaya po kami na itong ginawa po nating proyekto ay magiging plaza na ng bayan ng Sasmuan na open sa lahat ng tao,” ani Cuna.

Bahagi ang dalawang proyekto ng Manila Bay rehabilitation program na sumasaklaw sa National Capital Region, Central Luzon, at Calabarzon, at nakatuon sa river easement recovery, wastewater management, at pagbabawas ng solid waste.

Nanawagan si Cuna sa mga komunidad na pangalagaan ang mga parke at mga daluyan ng tubig upang mapanatili ang mga benepisyo ng rehabilitasyon. RNT

The post Mga dating pampang ng ilog gagawing parke sa ilalim ng Manila Bay rehab first appeared on Remate Online.

Sa panayam sa mga mamamahayag sa Cebu City, sinabi ni Hontiveros na hinihintay pa ng mga senator-judge ang presentasyon ng mga ebidensya at mga testigo mula sa prosekusyon at depensa.

“We are waiting for the first time, finally, marinig anumang mga ebidensya, mapakinggan, maaring matanong ang sinumang mga witnesses na iharap sa amin, both ng prosecution at ng defense,” ani Hontiveros.

Ginawa ng senador ang pahayag kasunod ng mga alegasyong hindi na umano susuriin ng Senado ang mga ebidensya at basta na lamang magpapasya sa impeachment case.

Ayon kay Hontiveros, walang katotohanan ang naturang mga pahayag dahil nanumpa ang mga senador bilang senator-judges at nakahandang gampanan ang kanilang tungkulin nang patas.

Aniya, nagsagawa na ng pre-trial proceedings ang impeachment court kung saan tinalakay ang mga dokumento at iba pang paunang usapin, ngunit ang mismong paglilitis pa rin ang yugto kung saan ihaharap ang mga ebidensya at mga testigo.

“So, I think imposible na mag-decide na lang kami at the outset. Kasi paano namin gagawin? Hindi namin puwedeng gawin ‘yun unless marinig nga po namin itong lahat ng ito,” dagdag niya.

Sinabi rin ni Hontiveros na ang mga testimonya, dokumento, at iba pang ebidensyang ihaharap sa paglilitis ang magsisilbing batayan ng bawat senator-judge sa kanilang magiging boto.

Nakatakdang magsimula ang pormal na paglilitis sa Hulyo 6. RNT

The post Risa pinabulaanan ‘lutong’ desisyon sa Sara impeachment trial first appeared on Remate Online.

MANILA, Philippines — Ipinag-utos ng Department of Agriculture (DA) ang pagsira sa P86.7 milyong halaga ng imported na pulang sibuyas mula China na inabandona sa Manila International Container Port (MICP) matapos mapatunayang hindi na ligtas para sa pagkain.

Binubuo ang shipment ng 26 na 20-foot containers na may kabuuang humigit-kumulang 650 metric tons o 72,215 sako ng pulang sibuyas, katumbas ng halos isang araw na pambansang konsumo.

Inirekomenda ng Bureau of Plant Industry (BPI) ang pagsira sa kargamento matapos makumpirma sa laboratory analysis na nagdudulot ito ng panganib sa kalusugan.

“The results of the laboratory analysis clearly show that the shipment poses serious health risks and is no longer fit for human consumption. We cannot allow these to enter the market,” ani Agriculture Secretary Francisco Tiu Laurel Jr.

“The proper course of action is the immediate destruction of the entire consignment.”

Ayon sa BPI, ang matagal na pagkakatengga at kakulangan sa wastong paghawak sa kargamento ang naging sanhi ng malawakang pagkasira ng mga sibuyas, kabilang ang pagsibol, pagkabulok, fungal infestation, discoloration, at mabahong amoy.

Babala pa ng ahensya, maaari itong magdulot ng kontaminasyon at pest infestation na banta sa biosecurity.

Dumating ang shipment noong nakaraang taon, kung saan ang ilan sa mga kargamento ay nakarating sa pantalan sa pagitan ng Disyembre 2025 at Enero 2026. Mayroon din itong tinatayang P9.7 milyong hindi nabayarang duties at taxes. Santi Celario

The post P86.7M inabandonang imported na sibuyas, sisirain ng DA first appeared on Remate Online.