Babaeng naglalakad lang sa bangketa, nabagsakan ng bakal sa Maynila

MANILA, Philippines – Sugatan ang isang babae na naglalakad lamang sa kahabaan ng Quintin Paredes Street sa Binondo, Maynila matapos mabagsakan ng bakal mula sa isang constructuction site.

Sa inisyal na ulat, naglalakad lamang sa bangketa ang biktima na tinatayang nasa edad 20 pataas nang biglang may mahulog na isang mahabang tubong bakal at nabagsakan sa ulo.

Ayon sa isang guwardiya ng isang establisyimento na nakasaksi sa pangyayari, nagulat na lamang siya nang biglang may kumalabog at nakita ang biktima na tinamaan.

Aniya, malaki ang naging sugat ng biktima sa noo dahil bumuka aniya ito at nagsisigaw ng tulong.

Bagamat mayroon namang nakalagay na safety net para sa failing debris nahulog pa rin ito at nakadisgrasya.

Agad namang may rumespondeng ambulansya at dinala sa ospital ang biktima.

Dumating din ang mga tauhan ng Manila Police District (MPD) at opisyal ng barangay para sa kaukulang imbestigasyon.

Hindi pa malaman ang pagkakakilanlan ng biktima dahil naglalakad lamang umano ito nang mangyari ang insidente. Jocelyn Tabangcura-Domenden