MANILA, Philippines – Ipinagpaliban ng Kamara ang deliberasyon ng badyet ng Department of Public Works and Highways (DPWH) noong Biyernes ng hapon, Setyembre 5.
Ikinadismaya ng bagong kalihim ng DPWH na si Vince Dizon, gaya ng mga miyembro ng Kamara ang mga iregularidad sa alokasyon ng ahensya sa ilalim ng 2026 NEP.
Sinadya ni Dizon na hindi gumawa ng anumang presentasyon sa mga mambabatas sa P881-bilyon na badyet ng DPWH para sa susunod na taon, dahil ito ay nakatakdang magsagawa ng malawakang overhaul.
“Ako po ay dumaan sa ilang briefing. Aaminin ko po sa inyo, Halos wala po akong maintindihan sa gulo ng budget na nakikita ko…marami-rami na rin po akong mga ahensyang nahawakan–ako po at litong-lito hanggang ngayon,” isinaad ni Dizon kay Nueva Ecija 1st district Rep. Mikaela Angela “Mika” Suansing, namumuno sa pagdinig ng Committee on Appropriations noong Biyernes.
“Napakalaking bagay po ng tulong ng honorable members of Congress para maipakita sa akin at sa buong sambayanan ang mga pagkakamali sa budget na ito,” ani Dizon.
“Kaya po ngayon, pasensya na po, hindi po ako makakapag-present…magsasayang lang po tayo lahat ng oras kung ako po ay magpre-present ng budget na babaguhin din po natin, sa tulong po ninyo,” aniya.
Si Mamamayang Liberal (ML) Party-list Rep. Leila de Lima ang kumilos na ipagpaliban ang budget ng DPWH habang nakabinbin ang bagong hitsura nito.
Ginawa ni Suansing ang parehong mga galaw pagkatapos makarinig ng walang pagtutol. Tungkol naman sa deadline ng DBM at DPWH para sa mga pagwawasto, binanggit niya na ang huling araw ng mga pagdinig ng bawat budget sa ahensya ay Setyembre 16.
“So in light of that, we are hoping to schedule the next hearing of the [DPWH] within that week, the week of Sept. 15 and 16,” aniya. Gayunpaman, inaasahan ng panel ng appropriations na matatanggap ang mga pagwawasto sa Setyembre 12, eksaktong isang linggo mula sa pagdinig. RNT/MND
