MANILA, Philippines – Malugod na tinanggap ng Philippine National Police ang bagong desisyon ng Supreme Court of the Philippines tungkol sa admissibility ng ebidensya, at tiniyak na hindi ito magreresulta sa pang-aabuso.
Pinapayagan ng ruling ang paggamit sa korte ng ebidensya na nakumpiska sa ilalim ng valid warrantless search kahit hindi ito nasa “plain view.” Dati, tanging nakikitang ebidensya lamang ang puwedeng gamitin, na nagdulot ng pangamba na maaaring hindi maisama ang mahahalagang ebidensya dahil sa teknikalidad.
Ayon kay PNP chief Gen. Jose Melencio Nartatez Jr., malinaw ng desisyon ang mga patakaran sa admissibility.
“It empowers our officers na hindi masayang ang ebidensya sa technicalities, as long as the initial stop or search was valid. Bilang kapulisan, responsibilidad natin ang ipatupad ang batas nang tama at patas sa lahat ng mamamayan,” ani Nartatez.
Binigyang-diin niya na hindi nagbibigay ang ruling ng walang limitasyong kapangyarihan sa pulisya.
“The SC ruling doesn’t mean we can search anyone at any time,” dagdag niya. “We assure the public that the PNP will continue to serve with integrity and respect for the rule of law.”
Ayon kay Nartatez, maaapektuhan nito ang mga routine operations at imbestigasyon sa buong bansa.
“We will review and update our Standard Operating Procedures to align with the ruling while protecting citizens’ rights. Even if the ‘plain view’ requirement is relaxed, dapat malinaw pa rin ang probable cause. Our focus is on documenting the legality of the operations,” paliwanag niya.
Idinagdag pa niya na ipapatupad ng PNP ang mahigpit na internal monitoring at accountability measures upang maiwasan ang pang-aabuso. RNT/MND
