Bago ang kanyang tagumpay sa Olympics, si Carlos Yulo ay isang batang nangangarap na maging atleta, lumaki sa mga lansangan ng Barangay 711 sa Leveriza, Maynila kung saan nagsimula ang kanyang landas tungo sa tagumpay.
At para sa mga unang nakasaksi sa kanyang pangarap na malaki — ang kanyang mga kapitbahay sa kanilang barangay — ay natutuwa silang makitang nakamit ng Filipino gymnast ang dati niyang pinaghirapan.
“Imaginin niyo po yun kapitbahay po namin, ngayon po, siya na ‘yung nagrepresent ng Pilipinas,” ayon sa isa sa kapitbahay ni Yulo.
Ngunit walang mas masaya sa tagumpay ni Yulo kaysa sa sarili niyang kamag-anak.
Ang lolo ni Yulo na si Rodrigo Frisco, na higit na kinikilala bilang isa sa mga taong nagtulak kay Yulo na subukan ang sport, ay nagsabing hindi na siya makapaghintay na makasamang muli ang kanyang apo, na ngayon ay itinuturing ng marami bilang isang modernong bayani.
“Gustong, gustong, gusto! Tagal nang hindi pumupunta rito eh, mahigit two years na yata eh,” ani Frisco.
Umayon naman ang lola ni Yulo na si Angelita Poqui: “Masaya kung pupunta siya rito magkaroon ng victory party, masaya diba? Everybody happy.”
Dumating sa bansa si Yulo at ang iba pang delegasyon ng Pilipinas noong Martes ng gabi pagkatapos tulungan ang bansa na makuha ang pinakamahusay nitong pagtatapos sa Olympic sa loob ng 100 taon.
