BATAS SA MODERNISASYON NG PHIVOLCS NILAGDAAN NI PBBM

NAGING ganap na batas na rin ang modernisasyon ng Philippine Institute of Volcanology and Seismology (PHIVOLCS) sa pamamagitan ng Republic Act No. 12180 na nilagdaan ni President Ferdinand “BBM” Marcos, Jr. matapos ang halos apat na dekada.

Layon ng bagong batas na mabigyan ang ahensya ng mga makabagong ka­gamitan, mataas na ka­sa­nayan ng mga tauhan, at mas maraming seismic stations upang mas epektibong matukoy at matunton ang mga lindol, pagputok ng bulkan, at iba pang seismic events, lalo na sa mga komunidad na nasa direktang panganib katulad ng Metro Manila na siyang sentro ng pamahalaang nas­yunal at eko­nomiya ng bansa.

Magkakaroon ng pagtatasa ng mga pamanta­yang operasyonal sa pa­ma­magitan ng pagbili at pagpapaunlad ng makaba­gong mga instrumento, ka­gamitan, pasilidad, at mga sistema upang mapa­lakas ang kakayahan ng PHIVOLCS sa pagbibigay ng kritikal, napapanahon, tumpak, at maaasahang datos hinggil sa kalagayan ng mga bulkan at lindol, gayundin ng lokal na babala at impormasyon bilang suporta sa mga desisyon sa kahandaan sa panganib ng kalamidad, pag-angkop sa pagbabago ng klima, se­guridad at pamamahala sa yamang-tubig, agrikultura, transportasyon, kalusu­gan, turismo, at iba pang sektor.

Papalalimin din ng batas na ito ang kakayahan ng bansa sa pananaliksik at pagpapaunlad sa pamamagitan ng sistematikong pamamaraan at integras­yon ng mga naunang na­buo nang mga metodolohiya upang mapabuti ang mga mahahalagang operasyon.
Kasama rin sa batas ang pagpapalawak ng mga monitoring stations para sa bulkan at lindol sa mga estratehikong lokasyon sa bansa, na may layuning ma­palawak ang saklaw ng serbisyo hanggang sa mga kanayunan.

Nakasaad din sa batas ang pagtaas ng sahod at benepisyo ng mga empleyado ng PHIVOLCS upang ma­palaganap ang propesyonalismo at dedikasyon sa kanilang serbisyo.

Ang mga pangunahing bahagi ng modernisasyon ay kinabibilangan ng:
– Pag-upgrade at maintenance ng pisikal na yaman at operasyonal na pa­mantayan;
– Pagpapaunlad ng Volcano Monitoring Network and Information System;
– Pagpapaunlad ng Earth­­quake Monitoring Network and Information System;
– Maaasahang monito­ring at pagpapalakas ng Earthquake Monito­ring Network para sa proteksyon o konserbas­yon ng mga istrukturang itinayo.

Nakapaloob sa batas ang paglikha ng PHIVOLCS Modernization Fund na ga­gamitin para sa pagpapatupad ng mga programa sa modernisasyon ng ahen­sya. Itinalaga ng Kongreso ang halagang Php 7 billion sa ilalim ng General Appropriations Act, na hiwalay at bukod sa regular na pondo ng Department of Science and Technology.

Bago ang bagong batas, sa pamamagitan pa ng Executive Order No. 128 ni President Corazon Aquino naisaayos ang mandato ng PHIVOLCS.

Kinakaharap ng ahensya ang matinding June 16, 1990 Luzon earthquake at ang Mount Pinatubo eruption noong June 1991 na nasundan ng matinding la­har.

Mahalaga ang moder­nisasyon ng PHIVOLCS sa maraming kadahilanan, lalo na sa isang bansang tulad ng Pilipinas na madalas ta­maan ng lindol, pagputok ng bulkan, at iba pang natural na sakuna dahil sa pagiging bahagi ng tinatawag na “Pacific Ring of Fire” kung saan aktibo ang mga bulkan at fault lines.

Ang modernisasyon ay hindi lamang tungkol sa ­teknolohiya, ito ay isang mahalagang hakbang tu­ngo sa mas ligtas, mas han­da, at mas matibay na bansa.