Bawal pa rin pahalik sa imahe ng Itim na Nazareno

MANILA, Philippines – Mahigpit na paalala ng pamunuan ng Simbahan ng Quiapo na bawal pa rin ang paghalik sa imahe ng Itim na Nazareno kapag sinimulan na ang “pahalik” ngayong Sabado, Enero 6 ganap na alas 7 ng gabi.

Ang mga deboto ay papayagan lamang na magpunas ng dala-dalang panyo o towel sa imahe.

Ang pagbabawal na ito ay upang maiwasan na rin ang posibleng hawaan pa sa Covid-19 dahil patuloy pa rin ang pagtaas ng mga kaso bagamat ito ay kontrolado.

Ito ay papalitan ng “Pagpupugay” kung saan ang mga deboto ay maari na lamang makatanaw o makalapit sa imahe ng Itim na Nazareno.

Sa pagbabalik ng Pahalik noong 2023, pinahintulutang hawakan ng mga deboto ang Itim na Nazareno gamit ang tuwalya o panyo.

Kasalukuyang inihahanda ang Quirino Grandstand para sa Black Nazarene Pahalik, na magsisimula mamayang gabi.

Handang -handa na rin ang kapulisan ng Manila Police District sa pamumuni ni Police District Director Police Colonel Arnold Thomas Ibay.

“Tuluy-tuloy po itong pagbabantay natin dito po sa Quiapo, at saka siyempre sa mga susunod na araw diyan naman sa Quirino Grandstand,” pahayag ni Ibay .

Magsisimula ang Misa para sa mga volunteer alas 6 mamayang hapon.

Sa Lunes, ang Panalangin sa Takipsilim ay ganap na alas-5:30 ng hapon, na susundan ng isang pagbabantay at programa sa ganap na alas-6:00 ng gabi.

Alas-12:00 ng tanghali ng Enero 9, isang Misa Mayor o Solemn Mass ang isasagawa bago ang pagpapatuloy ng vigil. (Jocelyn Tabangcura-Domenden)