MANILA, Philippines – Handa umano si dating Executive Secretary Lucas Bersamin na humarap sa pormal na imbestigasyon kaugnay sa umano’y insertions sa 2025 national budget.
Sa kabila nito ay sinabi niyang huwag lamang itong gagawin sa Senado.
”Wag na sa Senate dahil alam ko roon, there is nothing that I can say there na hindi… If ever they want to charge me as the mastermind, whatever case they want to file ….file it,” ayon kay Bersamin.
Nitong Martes, Nobyembre 18, tinukoy ni Senate President Pro Tempore Panfilo ”Ping” Lacson ang dalawang government undersecretaries na siyang gumamit ng pangalan ni Pangulong Ferdinand Marcos Jr. para makakuha ng kickback na P52 bilyon mula sa umano’y fund insertions sa 2025 national budget.
Ang mga ito ay tinukoy ni Lacson na sina dating Department of Education (DepEd) Undersecretary Trygve Olaivar at Presidential Legislative Liaison Office (PLLO) Undersecretary Adrian Bersamin.
Sinabi ni Lacson na ang mga ito ay rebelasyon ni dating Public Works Undersecretary Roberto Bernardo na bumanggit din kay dating Public Works Secretary Manny Bonoan at sa nakatatandang Bersamin.
“Sinabihan siya ni Usec. Trygve Olaivar na si Secretary Bonoan asked Executive Secretary Bersamin several times. Sino ba mag fafacilitate nitong P52 billion? Of course, isasama sa bicam, paano ito rerelease? Sino mag-fafacilitate? Ang sagot ni ES Bersamin sa kanya, ‘We will take care of it.’ Sila na daw bahala,” ani Lacson.
Nang tanungin kung si Lacson ba ay ‘misinformed,’ sinabi ni Bersamin na hindi niya mahuhusgahan ang pahayag ng senador at nirerespeto niya ang kanyang deklarasyon.
”Hindi ko alam ‘yan, I cannot judge the veracity of Senator Lacson’s statement. Batay sa handwritten, sulat ni Bernardo mga ganon, bahala silang magdiskarte diyan, but as far as I know, and the others are not that… sila lang ang gumagawa, ‘wag din ninyong sabihin na ako ang mastermind,” sinabi ni Bersamin.
Samantala, iginiit niyang ang lahat ng alegasyon laban sa kanya ay dapat na iharap sa korte.
”Alam mo naging judge at abogado, ako naging judge nang matagal. Itong mga bagay na ito, paratang na ganito, should ultimately be established in court. Hindi ko hinihingi na for purposes of these declarations, there should now be evidence acceptable by the court,” aniya. RNT/JGC
