‘Bigyang prayoridad ang mahihirap’ – Bong Go

MANILA, Philippines-Personal na namahagi ng karagdagang tulong si Senator Christopher “Bong” Go sa mga naghihirap na residente sa Banaybanay, Davao Oriental sa kanyang pagbisita dito noong Martes.

Ang kanyang pagbisita ay kasabay ng isang linggong pagdiriwang ng ika-55 Araw ng Banaybanay at Banayan Festival.

Binigyang-diin ang kahalagahan ng pag-angat ng buhay ng mga kapwa Mindanaoan, sinabi ni Go na patuloy niyang paghuhusayin ang kalusugan at kapakanan ng mga Pilipino tungo sa isang mas ligtas at malusog na kinabukasan para sa lahat.

Si Go at ang kanyang Malasakit Team ay namahagi ng mahahalagang support items sa kabuuang 4,750 residente sa panahon ng relief activities na ginanap sa municipal covered court ng bayan at sa Manuel B. Guinez High School Gymnasium.

Sa pakikipagtulungan sa mga pambansang ahensya at lokal na pamahalaan, namahagi rin ng tulong pinansyal sa bawat kwalipikadong benepisyaryo.

Pinuri rin ni Sen. Go ang pagsisikap ng mga lokal na lider sa pamamahagi ng suporta sa mga nangangailangang sektor, kabilang sina Congressman Nelson Dayanghirang, Mayor Ian Larcia, at iba pa.

“Prayoridad ko ang pagsuporta sa pro-poor programs at dapat po ay sikapin ng gobyerno na walang magutom na Pilipino. ‘Yan po ang pakiusap ko parati sa kapwa ko lingkod bayan,” sabi ni Go na tinaguriang Mr. Malasakit dahil sa kanyang walang kapagurang serbisyo sa mahihirap.

At bilang tagapangulo ng Senate committee on health and demography, hinimok ni Go ang komunidad na bisitahin ang Malasakit Center sa Davao Oriental Provincial Medical Center sa Mati City.

Ang Malasakit Centers ay idinisenyo upang mapadali ang pag-access sa tulong medikal ng gobyerno sa pamamagitan ng pagsasama-sama ng mga ahensya sa iisang bubong.

Ang programang Malasakit Centers, na ipinagkampeon ni Go, ay matagumpay na nakapagtatag na ng 165 Malasakit Centers sa buong bansa.

“Nasa loob na po ng isang kwarto sa ilang mga pampublikong ospital ang apat na ahensya ng gobyerno na may mga medical assistance programs para hindi na kayo kailangang pumila at bumiyahe pa sa iba’t ibang opisina para humingi ng tulong pampagamot,” ani Go.

Sa kanya namang kapasidad bilang vice chairperson ng Senate committee on finance, aktibong pinadali ni Go ang iba’t ibang development projects sa Davao Oriental.

Sa Banaybanay, kasama sa kanyang mga inisyatiba ang rehabilitasyon ng mga lokal na kalsada, ang pagtatayo ng mga multipurpose na gusali, paglalagay ng street lighting system, at pagpapahusay sa drainage system ng bayan.

Sa buong lalawigan, sinuportahan ni Go ang pagtatayo ng ilang pangunahing proyekto sa Mati City, tulad ng Davao Oriental Sports Complex, ang pagsasaayos ng Buso Hot Spring Park, at ang pagtatayo ng Public Park/Eco-Tourism Park.

Kasama rin sa kanyang pagsisikap ang rehabilitasyon ng mga kalsada sa Baganga, Boston, Caraga, Lupon, Manay, at San Isidro; ang pagtatayo ng mga multipurpose building sa Lupon, Governor Generoso, San Isidro, at Caraga; at ang paglalagay ng mga potable water system sa Baganga, Lupon, at Manay.

Naging instrumento rin siya sa pagpapatupad ng flood mitigation structures at drainage system rehabilitation sa iba’t ibang bayan, kasabay ng pagtatayo ng bagong slaughterhouse sa San Isidro. RNT