MAYNILA – Sa gitna ng patuloy na hamon sa ekonomiya ng bansa mula sa pagtaas ng presyo ng langis hanggang sa epekto ng pandaigdigang tension, lalong nagiging mahalaga ang bawat ambag ng mamamayan sa pagpapatibay ng ating pambansang pondo. Isang konkretong hakbang upang maisakatuparan ito ay ang pagpapalawak ng kaalaman ng publiko hinggil sa tamang pagdedeklara at paghahain ng buwis.
Ito ang naging sentro ng ginanap na “Seminar on 2025 Annual Income Tax Return Filing and Payment” noong March 29, 2026. Ang inisyatibong ito ay pinangunahan ng Bureau of Internal Revenue (BIR) Revenue District Office No. 30 – Binondo, sa ilalim ng pamumuno ni RDO Ricardo D. Go, sa pakikipagtulungan ng Federation of Filipino-Chinese Chamber of Commerce and Industry, Inc. (FFCCCII) na kinatawan ni President Victor Lim, at ng inyong Agarang Serbisyo.
Pagkakaisa ng mga Sektor
Mahigit 200 accountant, bookkeeper, at negosyante mula sa iba’t ibang sektor sa Binondo at mga kalapit na lugar ang dumalo sa naturang seminar. Ang mataas na bilang ng mga kalahok ay isang malinaw na indikasyon ng pagnanais ng publiko na maging mas maalam at responsable sa kanilang obligasyong buwis.
Ayon sa pamunuan nina RDO Ricardo Go at President Victor Lim, sa panahong ang maling pag-file o hindi tamang pagbabayad ay maaaring magdulot ng mabibigat na parusa, ang ganitong uri ng pagtitipon ay hindi lamang kapaki-pakinabang kundi kinakailangan upang mapangalagaan ang interes ng mga negosyante at ng pamahalaan.
Pag-unawa sa mga BIR Forms
Binigyang-linaw sa seminar ang paggamit ng iba’t ibang kategorya ng BIR forms depende sa uri ng kita at istruktura ng negosyo:
* BIR Form 1700: Para sa mga purely compensation income earners.
* BIR Form 1701: Para sa mixed income earners.
* BIR Form 1701-MS: Para sa micro and small taxpayers.
* BIR Form 1701A: Para sa mga gumagamit ng optional standard deduction.
* Serye ng 1702 (1702-EX, 1702-MX, at 1702-RT): Para sa mga korporasyon depende sa kanilang tax regime.
Modernisasyon sa Pagbabayad
Bukod sa teknikal na kaalaman sa mga forms, binigyang-diin din ang tamang proseso ng pagbabayad. Itinuro ang transisyon mula sa manual filing patungo sa paggamit ng Electronic Filing and Payment System (eFPS) at eBIRForms, na siyang pamantayan na ngayon sa modernong tax administration para matiyak ang bilis at seguridad ng bawat transaksyon.
Ang pagkakaroon ng tamang kaalaman ay nagsisilbing mahalagang sandata ng bawat taxpayer upang maiwasan ang penalties o audit issues.
Sa pamamagitan ng pagtutulungang ito ng BIR RDO 30, FFCCCII, at ng publiko, mas napatitibay ang pundasyon ng ating ekonomiya tungo sa mas maunlad na kinabukasan.
