MANILA, Philippines – Inihayag ni Senator Christopher “Bong” Go na napakahalaga ng pagsuporta ng gobyerno sa pagpapalakas sa mga kooperatiba dahil sa malaking kontribusyon nito sa pagbibigay ng kabuhayan at pagtaas ng kita ng mga miyembro.
Sa pamamagitan ng mga hakbangin tulad ng programang Malasakit sa Kooperatiba, patuloy na nagtataguyod si Senator Go ng mga hakbang na mag-aangat sa maliliit na organisasyon at kooperatiba sa buong bansa.
Isang halimbawa ng epekto ng programa ay ang Matilo Santo Niño Water Service Cooperative (MASTOWASECO), na nakabase sa Nabunturan, Davao de Oro.
Ang kooperatiba, na nahirapang mapanatili ang suplay nila sa tubig dulot ng sunod-sunod na mapangwasak na lindol sa lalawigan, ay nakatanggap ng financial grant sa ilalim ng Malasakit sa Kooperatiba program, na pinasimulan ng Cooperative Development Authority (CDA) sa suporta ni Go.
“Alam po natin ang malaking papel ng mga kooperatiba sa pagpapaunlad ng ating lokal na ekonomiya, lalo na sa mga komunidad na ating pinaglilingkuran. Ang bawat isa sa inyong mga samahan ay instrumento ng malasakit, pagkakaisa, at pag-asa para sa inyong nasasakupan,” sabi ni Go.
Ang pinansiyal na suporta, na pinadali sa pamamagitan ng CDA sa tulong ni Go, ay upang palakasin ang kapasidad ng mga kooperatiba na mapabuti ang kabuhayan ng mga miyembro at magbigay ng mas magandang pagkakataon.
