Bong Go, nakiisa sa ika-40 taon ng El Shaddai

MANILA, Philippines – Sa pagdiriwang na puno ng pananampalataya at pagkakaisa, nakiisa si Senator Christopher “Bong” Go sa El Shaddai sa pagdiriwang nito ng ika-40 anibersaryo sa Quirino Grandstand sa Maynila noong Sabado, kasabay ng ika-85 kaarawan ni Brother Mike Velarde, ang iginagalang na spiritual leader ng religious group.

Ang okasyon ay dinaluhan din ng iba pang pangunahing personalidad, kinabibilangan nina Senator Mark Villar, dating Pangulo at ngayo’y Congresswoman Gloria Macapagal-Arroyo, Congresswoman Lani Mercado, Siniloan, Laguna Mayor Patrick Go, at iba pa.

Sa kanyang mensahe, taos-pusong binati ni Senator Go si Bro. Mike at ang buong El Shaddai community, kasunod ng pagpuri sa grupo sa kanilang hindi natitinag na pananampalataya at paglilingkod.

“Isang mapagpalang araw sa ating lahat, lalo na sa mga kapatid natin sa El Shaddai. Ngayon ay isang espesyal na araw sapagkat ipinagdiriwang natin ang ika-85 kaarawan ng ating minamahal na Bro. Mike Velarde at ang ika-40 anibersaryo ng El Shaddai—dalawang mahalagang milestone sa buhay ni Bro. Mike at sa kasaysayan ng inyong samahan,” ani Go.

“Brother Mike, ang iyong buhay ay isang patotoo ng masigasig na pananampalataya at walang pagod na dedikasyon sa paglilingkod sa kapwa. Salamat sa iyong walang-sawang paggabay sa ating mga kababayan patungo sa espiritwal na paglago at pagpapalalim ng kanilang pananampalataya,” dagdag ng senador.

Binigyang-diin ni Senator Go ang kahalagahan ng El Shaddai hindi lamang bilang isang relihiyosong grupo kundi bilang isang komunidad na nagpabago sa milyun-milyong buhay.

Muling iginiit ng senador ang kanyang pangako na susuportahan ang espirituwal at moral na pagsisikap ng grupo, lalo’t naniniwala siya sa prinsipyong patuloy na gumagabay sa kanya na ang paglilingkod sa publiko ay paglilingkod sa Diyos.

“Bilang inyong lingkod sa Senado, patuloy akong magiging kaagapay ninyo sa mga adhikain na nagpapalakas sa espiritwal at moral na aspeto ng ating lipunan.”

“Ito ay dahil naniniwala ako na ang serbisyo sa tao ay serbisyo sa Diyos. Kaya kung ano man ang kabutihang pwede nating gawin sa ating kapwa ay gawin na natin dahil hindi na tayo babalik sa mundong ito,” paliwanag ng mambabatas.

Pinasalamatan din ng senador ang mga miyembro ng El Shaddai sa ibinigay sa kanyang tiwala at suporta, gayundin sa mga panalangin na nagbibigay sa kanya ng lakas upang patuloy na maglingkod sa bayan.

Hinikayat ni Go ang lahat na manatiling matatag sa kanilang pananampalataya at patuloy na magtulungan para sa kabutihang panlahat.

“Sa ating patuloy na pagtutulungan, nawa’y magtagumpay tayo sa pagdadala ng liwanag ng Diyos sa ating mga buhay at komunidad. Sama-sama tayong maglingkod sa Kanya,” pagtatapos ni Go. RNT