Bong Go: Volunteerism sa community service, mahalaga

MANILA, Philippines – Binigyang-diin ni Senador Christopher “Bong” Go ang kahalagahan ng volunteerism, healthcare innovations, at community partnerships matapos siyang dumalo sa ika-77 Founding Anniversary ng Philippine Red Cross (PRC) at 75th Anniversary ng Quezon City Chapter nito noong Lunes.

Sa imbitasyon ni PRC Quezon City Chapter Governor Ernesto Isla, unang dumalo si Go sa inagurasyon ng bagong PRC Quezon City Chapter building sa Liwasang Aurora sa loob ng QC Hall compound, na sinundan ng mass oath-taking ceremony para sa 6,000 bagong PRC volunteers sa QC Memorial Circle.

Inilarawan ng senador na ang nasabing bagong pasilidad ay hindi lang basta isang gusali, kundi isa ring sentro ng pag-asa at tulong. Ipinapakita aniya nito ang hangaring maglingkod at ang dedikasyong makatulong sa mga nangangailangan.

Ibinahagi ni Go na sa pamamagitan ng inisyatiba ng PRC-QC Chapter sa pakikipag-ugnayan sa kanyang tanggapan, pinag-aaralan ngayon ng Department of Health (DOH) ang posibilidad na maglagay ng Red Cross counter sa loob ng Malasakit Centers para mabigyan ng mas mabilis na access ang publiko sa blood facilities na pakikinabangan ng mahihirap na pasyente.

“Pareho po tayo ng layunin — ang tumulong sa mga nangangailangan at mailapit ang serbisyo na kailangan para makapagligtas ng buhay lalo na pagdating sa kalusugan at kaligtasan ng bawat Pilipino,” sabi ni Go.

Ang Malasakit Centers ay isang one-stop shop para sa mahihirap na pasyente na nais mabawasan ang kanilang gastusin sa ospital sa pinakamaliit na posibleng halaga.
Si Go ang pangunahing may-akda at sponsor ng Republic Act No. 11463 o ang Malasakit Centers Act of 2019, na nag-institutionalize sa Malasakit Centers program.

Mayroon nang 162 Malasakit Centers na operational sa buong bansa, na handang tumulong sa mga gastusin sa pagpapagamot ng mga pasyente.

Sa panunumpa ng Red Cross volunteers na karamihan ay mula sa sektor ng kabataan, iginiit ni Go ang kanyang pagsisikap na ang mga kabataan ay maging produktibo at ituro sa kanila ang halaga ng volunteerism, camaraderie, disiplina at sportsmanship. Pinuri niya ang mga ito sa pagboboluntaryo na maging bahagi ng Red Cross.

Para isulong ang kapakanan ng mga volunteer, inihain ni Go ang Senate Bill No. 1709, na may pamagat na “Hazard Pay for All Disaster Personnel and Volunteers Act of 2023.”

Ang batas na ito ay nag-aatas sa LGU na magbigay ng hazard pay sa mga tauhan ng kanilang Local Disaster Risk Reduction and Management Offices (LDRRMOs), Barangay Risk Reduction and Management Committees (BRRMCs), at sa lahat ng accredited community disaster volunteers (ACDVs).

“Marami pong matutulungan ang inyong mga volunteer. Maraming buhay po ang maililigtas sa inyong pagbo-volunteer. At kayo po ang bayani ng panahon ng mga krisis tulad noong pandemya. Sa pakikipagtulungan ng Red Cross, ng gobyerno, at ng ating mga kababayan, marami pong buhay na maililigtas,” ayon kay Go.

Sa nasabing pagdiriwang, kinilala at pinuri rin ni Go ang mga lokal na opisyal, kabilang sina Mayor Joy Belmonte at Vice Mayor Gian Sotto, dating alkalde at House Speaker Feliciano Belmonte Jr., mga opisyal ng PRC na sina dating senador, Chairman at CEO Richard Gordon, Secretary General Gwendolyn Pang, at iba pang opisyal, miyembro ng PRC. RNT