MANILA, Philippines – Nagbabala ang PAGASA na maaaring magkaroon ng tropical cyclone sa loob ng Philippine Area of Responsibility (PAR) sa Enero, na posibleng mag-landfall malapit sa Eastern Visayas o Caraga Region. Gayunpaman, may posibilidad ding lumihis ang bagyo palayo sa bansa.
Sa kasalukuyan, ang bansa ay apektado ng Intertropical Convergence Zone (ITCZ) at ang shear line. Ang ITCZ ay nagdudulot ng maulap na papawirin na may kalat-kalat na mga pag-ulan at pagkidlat-pagkulog sa ilang lugar, kabilang ang Visayas, Caraga, Davao Region, Palawan, Romblon, Catanduanes, Albay, Sorsogon, at Masbate. Ang ibang bahagi ng Mindanao ay inaasahang magkakaroon ng bahagyang maulap hanggang sa maulap na papawirin na may pulu-pulong mga pag-ulan o pagkidlat-pagkulog.
Samantala, ang shear line ay nagdudulot ng maulap na kalangitan na may kalat-kalat na pag-ulan at pulu-pulong pagkidlat-pagkulog sa mga lugar tulad ng Metro Manila, Calabarzon, Cagayan, Isabela, Quirino, Apayao, Aurora, Bulacan, Marinduque, Oriental Mindoro, Camarines Norte, at Camarines Sur. Ang nalalabing bahagi ng Luzon ay magkakaroon ng bahagyang maulap hanggang sa maulap na papawirin na may pulu-pulong mga pag-ulan o pagkidlat-pagkulog.
Ang Northeast Monsoon ay inaasahang magdadala ng maulap na papawirin na may mga pag-ulan sa Batanes, habang ang Ilocos Region, nalalabing bahagi ng Cordillera Administrative Region, at Nueva Vizcaya ay makakaranas ng bahagyang maulap hanggang sa maulap na papawirin na may pulu-pulong mahinang mga pag-ulan. RNT
