MANILA, Philippines – Opisyal nang idineklara ng Department of Agriculture (DA) na bird flu-free ang Bulacan, halos isang taon matapos ang outbreak sa isang commercial duck farm sa Pandi.
Ayon kay Agriculture Secretary Francisco Tiu Laurel Jr., ginawa ang deklarasyon matapos ang “extensive disease surveillance” na nagpakita ng negatibong resulta para sa virus sa apektadong lugar at paligid nito.
Matapos makumpirma ang outbreak noong Disyembre ng nakaraang taon, agad na nagpatupad ang DA, provincial government, at lokal na ahensya ng control measures sa ilalim ng Avian Influenza Protection Program, kabilang ang depopulation, disinfection, movement restrictions, at masusing monitoring sa mga surveillance zones.
“Subsequent surveillance showed no further presence of the influenza type A virus, meeting the criteria of the World Organization for Animal Health’s (WOAH) Terrestrial Animal Health Code,” ayon sa DA.
Naayos din ang mga nakaraang kaso ng HPAI noong 2022 at 2023 sa pamamagitan ng mabilis na tugon at pagpapatupad ng biosecurity.
Binanggit ng DA na anumang muling kumpirmadong outbreak ay magdudulot ng agarang pagbawi ng bird flu-free status at muling pagpapatupad ng containment measures. Santi Celario
