LA UNION, Philippines – Ligtas na naipanganak ng isang babae ang kanyang sanggol sa loob ng service van ng Bureau of Fire Protection (BFP) sa Sto. Tomas, La Union, matapos manganak habang papunta sa ospital noong Linggo, Agosto 24, 2025.
Dalawang bumbero, na parehong trained nurse, ang rumesponde at tinulungan siya sa loob ng kanilang L300 service vehicle.
Bago sila makarating sa ospital, nanganak si Jonabel sa loob ng van. Sa tulong ng mga bumbero, naipanganak niya ang isang malusog na sanggol na lalaki, na pinangalanan niyang Eugie Cairo.
Sinabi ni Sto. Tomas Fire Station Deputy Marshal SFO3 Luis Laroco na ang insidente ay sumasalamin sa mas malawak na papel ng mga bumbero sa komunidad.
“Nakakagaan ng pakiramdam na ganun ang impression ng mga tao, lalong-lalo na dito sa bayan ng Santo Tomas. Ibig sabihin po na ‘yung mga ginagawa nating campaign para mai-disseminate ‘yung mga bagay na hindi lang para sa sunog kundi maging sa ibang emergency ay kaya nating i-address,” aniya.
“Every shift po kasi ay mayroon tayong nakahanda na nurse na umaalalay sa mga biktima ng vehicular accident at maging sa mga medical assistance po,” dagdag niya.
Tiniyak ng BFP sa publiko ang kanilang patuloy na pangako na maglingkod hindi lamang sa panahon ng sunog kundi maging sa iba pang emergency na nangangailangan ng agarang pagtugon. RNT/MND
