Buntis, sanggol nasagip sa kasagsagan ng mataas na baha sa Malabon

MANILA, Philippines – Ligtas at matagumpay na nailikas ang isang buntis na ina at sanggol sa kasagsagan ng baha sa Malabon.

Sa pinakahuling situational report ng Philippine Coast Guard (PCG), kabilang sila sa mga inilikas ngayong hapon, Hulyo 23, sa kasagsagan ng baha sa Barangay Hulong Duhat na matatagpuan sa ilalim ng Malabon Bridge.

Dinala ang mga inilikas sa Malabon City National High School na nagsisilbi bilang evacuation center ng syudad.

Isinailalim sa medical evaluation ang mga evacuees, lalo na ang mga senior citizen, buntis, sanggol, at mga kabataan, upang mabantayan ang kanilang kalusugan ngayong panahon ng tag-ulan.

Samantala, nagsagawa rin ng rescue operation ang PCG at Municipal Disaster Risk Reduction Management Office para sa isang Person with Disability sa Bacoor City, Cavite ngayong araw. Jocelyn Tabangcura-Domenden