MANILA, Philippines – Ang buntot ng Tropical Storm Bebinca ay magdadala ng maulap na papawirin na may kalat-kalat na pag-ulan sa silangang bahagi ng bansa habang ang Southwest Monsoon o Habagat ay makakaapekto sa natitirang bahagi ng bansa sa Miyerkules, iniulat ng PAGASA.
Patuloy na binabantayan ng weather bureau ang Tropical Storm Bebinca, ang tropical cyclone sa labas ng Philippine Area of Responsibility (PAR).
Huling tinatayang nasa 2,070 kilometro silangan ng Eastern Visayas, taglay ang lakas ng hanging aabot sa 75 kilometro bawat oras na may pagbugsong aabot sa 90 kph at kumikilos pakanluran hilagang-kanluran sa bilis na 25 kph.
Ang Silangang Visayas, Caraga, Sorsogon, at Masbate ay magkakaroon ng maulap na papawirin na may kalat-kalat na mga pag-ulan at pagkidlat-pagkulog dahil sa labangan ng Tropical Storm Bebinca na may posibilidad na magkaroon ng flash flood o landslide dahil sa katamtaman hanggang sa kung minsan ay malakas na pag-ulan.
Ang Cagayan Valley, Aurora, Quezon, at ang natitirang bahagi ng Bicol Region ay magkakaroon ng bahagyang maulap hanggang sa maulap na papawirin na may pulu-pulong mga pag-ulan o pagkidlat-pagkulog dahil sa labangan ng tropikal na bagyo. Sa panahon ng matinding bagyo, maaaring magkaroon ng flash flood o landslide.
Ang Metro Manila at ang nalalabing bahagi ng bansa sa kabilang banda ay magkakaroon ng bahagyang maulap hanggang sa maulap na papawirin na may pulu-pulong mga pag-ulan o pagkidlat-pagkulog dulot ng Southwest Monsoon na may flash flood o landslide na posibleng magaganap sa panahon ng matinding pagkulog.
Ang buong bansa ay makakaranas ng mahina hanggang sa katamtamang hangin na kumikilos sa timog-kanluran hanggang kanluran habang ang mga baybaying dagat ay magiging mahina hanggang sa katamtaman.
Sumikat ang araw bandang 5:45 a.m., habang lulubog ito ng 6:01 p.m. RNT
