MANILA, Philippines- Hiniling ng isang senador sa Office of the Ombudsman na imbestigahan ang lahat ng matatas na opisyal ng Gabinete na sangkot sa pag-aresto kay dating Pangulong Rodrigo Roa Duterte noong Marso 11.
Personal na isinumite ni Senador Imee Marcos ang committee report ng Senate Committee on Foreign Relations sa Ombudsman kamakailan.
Sa kanyang liham kay Ombudsman Samuel Martires, pawang appointee ni Duterte, sinabi ni Marcos na nadiskubre ng komite ang pagkilos ng ilang matataas na opisyal ng pamahalaan na maaaring sampahan ng kasong criminal at administratibo.
“I am requesting that these officials, all of whom are named in the Report, be investigated, and where appropriate, prosecuted and/or sanctioned in accordance with the applicable laws, rules and regulations,” ayon sa liham sa Ombudsman.
“Tina-transmit ko ang Chairman’s report na bunga ng Senate investigation on the arrest and extraordinary rendition of President Rodrigo Duterte na tinangay siya hanggang sa Hague,” ayon sa senadora.
Mukhang maliwanag na maraming nilabag sa batas, sa Saligang Batas, pati sa international law,” dagdag ni Marcos.
“Kaya’t mananagot, kinakailangan, kung mapatunayan ang lahat na ito ang ilan pong napaka-taas na opisyal natin,” wika pa niya.
Inirekomenda ng committee report ang paghahain ng kasong criminal at administratibo laban kina Justice Secretary Jesus Crispin Remulla, PNP Criminal Investigation and Detection Group Chief Maj. Gen. Nicolas Torre III, Interior Secretary Jonvic Remulla, Philippine National Police Chief Gen. Rommel Marbil, at Special Envoy for Transnational Crime Markus Lacanilao.
Mahigpit na ipinagtanggol ng naturang opisyal ang pagkilos ng pamahalaan hinggil sa pag-aresto kay Duterte at pinabulaanan ang “kidnapping” na inaakusa ng Duterte camp.
“Legal man o hindi, kinailangan talaga isama dahil inamin niya na siya talaga ang nag-utos itong mga pangyayari na hindi naman katanggap-tanggap,” ayon sa senadora.
“Inaasahan ko na ang ating mahal na Ombudsman ay tuluyang imbestigahan kasi nga hinaharang ito sa Senado. Nahihirapan kami na kumuha ng testigo. At sana kung kinakailangan, patawan na ng kaso at ng parusa,” giit pa niya.
Kabilang sa mga kasong inirekomenda ng komite laban sa mga indibiduwal na nabanggit:
Justice Secretary Remulla: Usurpation of Judicial Functions (Article 241 of the Revised Penal Code), violation of the Anti-Graft and Corrupt Practices Act.
Maj. Gen. Torre: Arbitrary Detention (Article 124 of the Revised Penal Code), violation of the Anti-Graft and Corrupt Practices Act, Grave Threats under Article 282 of the Revised Penal Code, violation of Republic Act No. 7438.
Gen. Marbil: Arbitrary Detention (Article 124 of the Revised Penal Code), violation of the Anti-Graft and Corrupt Practices Act
Interior Secretary Remulla: Arbitrary Detention (Article 124 of the Revised Penal Code), violation of the Anti-Graft and Corrupt Practices Act
Lacanilao: Usurpation of Official Functions (Article 177 of the Revised Penal Code), False Testimony in Other Cases and Perjury in Solemn Affirmation. Ernie Reyes
