MANILA, Philippines – Nagpadala ang Philippine Coast Guard (PCG) ng patrol vessel upang hamunin at paalisin ang barko ng China Coast Guard (CCG) na matagal nang umiikot sa kanlurang bahagi ng Luzon.
Ayon sa PCG, nagsasagawa ng maritime patrol mula pa noong Hunyo 20 ang BRP Malabrigo laban sa CCG vessel 5304 na namataan sa loob ng exclusive economic zone (EEZ) ng Pilipinas.
Ilang ulit umanong nagbigay ng radio challenge ang mga tauhan ng BRP Malabrigo, ngunit hindi tumugon ang barko ng China.
Sa isinagawang maritime domain awareness flight noong Lunes, namataan ang CCG vessel mga 45.5 nautical miles sa kanluran ng Iba, Zambales.
Ayon kay PCG spokesperson for the West Philippine Sea na si Rear Admiral Roy Vincent Tarriela, umiikot ang barko ng China sa pagitan ng 27 at 45 nautical miles mula sa kanlurang baybayin ng Luzon mula pa noong Hunyo 16.
Pinakamalapit itong namataan sa layong 27.29 nautical miles mula sa Burgos, Ilocos Sur, habang umabot naman sa 30 nautical miles mula sa Capones Island sa Zambales ang pinakatimog nitong lokasyon.
Sinabi ni Tarriela na ang galaw ng barko ay nagpapakitang nagpapatrolya ito sa mga bahaging inaangkin ng China sa West Philippine Sea gamit ang tinatawag nitong nine-dash o ten-dash line, na pinawalang-bisa ng 2016 Arbitral Award.
Sa kabila ng presensya ng barko ng China, tiniyak ng PCG na magpapatuloy ang kanilang mga patrol upang protektahan ang karapatan ng Pilipinas at ng mga Pilipinong mangingisda sa loob ng bansa’s maritime zones.
Iginiit din ng PCG na ipagpapatuloy nito ang pagbubunyag ng mga ilegal, mapilit, agresibo, at mapanlinlang na aktibidad ng China sa West Philippine Sea. RNT/MND
