CEBU, Philippines — Nagpahayag ng pagkabahala ang Philippine Exporters Confederation (Philexport)-Cebu sa ipapataw na karagdagang 12.5% tariff ng Estados Unidos sa mga produktong iniluluwas ng Pilipinas.
Nanawagan ang grupo sa pamahalaan na makipag-ugnayan sa Office of the United States Trade Representative (USTR) upang mabawasan ang epekto ng bagong taripa sa mga exporter.
Ayon kay Federico Escalona Jr., executive director ng Philexport-Cebu, malaking dagok ito lalo na sa maliliit at katamtamang laki ng mga negosyo na umaasa sa US bilang isa sa kanilang pangunahing merkado.
“The proposed tariff could reduce the competitiveness of Philippine products in the US market at a time when exporters are already coping with high production costs, expensive logistics, and intense global competition,” saad ni Escalona.
Ipinataw ni US President Donald Trump ang karagdagang 12.5% tariff sa mga bansang hindi umano nakatutugon sa sapat na mga hakbang laban sa mga produktong gawa gamit ang forced labor.
Iginiit ng Philexport-Cebu na sinusuportahan nila ang makataong labor practices at responsable at sumusunod sa mahigpit na labor standards ang marami sa kanilang miyembro.
Ayon kay Escalona, mas mainam ang kooperasyon at pagpapalakas ng compliance systems kaysa sa pagpapataw ng dagdag na taripa.
Nanawagan din ang grupo sa Department of Trade and Industry (DTI), Department of Foreign Affairs (DFA), Department of Labor and Employment (DOLE), at Bureau of Customs (BOC) na agad makipagpulong sa USTR upang matugunan ang isyu. RNT/MDS
