MANILA, Philippines- Kasalukuyang nasa kustodiya ng National Bureau of Investigation ang negosyanteng si Cedric Lee matapos siyang hatulan ng Taguig court, kasama si Deniece Cornejo, at dalawa pa na guilty sa serious illegal detention.
Ayon sa ulat, boluntaryong sumuko si Lee sa mga awtoridad.
Hinatulan ng Taguig court nitong Huwebes ang negosyanteng si Lee, Cornejo, Ferdinand Guerrero, at Simeon Razguilty ng ilegal na pagditene sa TV host at aktor na si Vhong Navarro noong 2014.
Sa 94 pahinang desisyon ng Taguig RTC Branch 153, hinatulan sina Lee, Deniece Cornejo, Ferdinand Guerrero at Simeon Raz ng reclusion perpetua o katumbas ng 40 taong pagkakulong kaugnay sa kaso noong 2014.
“It is all too apparent that the accused planned and premeditated to restrain Vhong Navarro to extort money from him. Proof of their agreement is inferred from their conduct before, during, and after the commission of the crime,” ayon sa korte.
Base sa korte, nakitaan ang mga akusado ng “common understanding between them” sa pagsasagawa ng krimen.
Iniutos rin ng korte sa mga akusado na bayaran si Navarro ng P100,000 bilang civil indemnity, P100,000 bilang moral damages at P100,000 bilang exemplary damages.
Kinansela rin ng korte ang bail bond ng mga akusado. RNT/SA
